जगदिश ढकाल, नेपालगन्ज ।
राष्ट्रघाती नागरिकता विधेयकविरुद्ध राष्ट्रिय जनमोर्चा बाँकेले विरोध प्रदर्शन गरेको छ । संसदको दुवै सदनबाट पारित नागरिकता विधेयक राष्ट्रघाती भएको ठहर गर्दै राजमो बाँकेले उक्त विरोधसभा गरेको हो ।
नेपालगन्जको भेरी अस्पताल चोकमा आयोजित विरोधसभालाई सम्बोधन गर्दै अखिल नेपाल किसान महासङ्घका महासचिव तुलसीराम सापकोटाले अंगीकृत सन्तानलाई वंशजको नागरिकता जन्मको आधारमा दिएको कारणले फिजीको जस्तै नेपाल पनि हुन सक्ने बताउनुभयो ।
उहाँले सरकारले चालेको कदमले देश फिजीकरण हुँदै सिक्किम सम्म जाने खतरा भएकोले नागरिकता विधेयक खारेज गर्न आन्दोलनमा शरीक हुन आह्वान गर्नुभयो ।
उक्त कार्यक्रममा अखिल नेपाल युवक संघका केन्द्रीय अध्यक्ष कृष्णराज पाण्डेले बिदेशी चेली विवाह गरेर आएमा तुरुन्त नागरिकता पाउने प्राबधान नभएको उल्लेख गर्दै यसरी नागरिकता वितरण गर्दै जांदा नेपालको राष्ट्रपति, प्रधानमन्त्री, अदालत तथा संवैधानिक निकाय सबै विदेशी मुलुकका व्यक्तिले कब्जा गर्ने खतरा भएको बताउनुभयो ।
त्यसले गर्दा नेपालीहरु नेपालमै अल्पमतमा पर्ने भएको हुनाले तुरुन्तै खारेजी गर्नुपर्ने माग राख्नुभयो । जातीय समता समाजका केन्द्रीय सदस्य मानबहादुर सुनारको सञ्चालनमा अघि बढेको कार्यक्रममा जिल्लाका नेता तथा कार्यकर्ताहरूको उपस्थिति रहेको थियो ।
