काठमाडौं । राष्ट्रपति विद्यादेवी भण्डारीले विवादित नागरिकता विधेयकबारे आफूले अध्ययन गर्ने बताउनुभएको छ ।
मंगलबार विभिन्न सञ्चार माध्यमका सम्पादकहरुसँग राष्ट्रपति भण्डारीले संसदबाट विधेयक आइपुगेपछि आफूले अध्ययन गर्ने बताउनुभएको हो ।
नागरिकता विधेयकमा कतिपय गलत प्रावधानहरु समेटिएकोप्रति पत्रकारले राष्ट्रपतिको ध्यानाकर्षण गराएका थिए । त्यसक्रममा राष्ट्रपति भण्डारीले भन्नुभयो ‘नागरिकताबारे अध्ययन गर्नुपर्छ। पहिला यहाँ आओस्, त्यसपछि हेर्छु।’
राष्ट्रपति भवन शीतलनिवासमा आयोजित कार्यक्रममा राष्ट्रपति भण्डारीले भन्नुभयो, ‘यो आजको रोग होइन, अंगीकृतका विषयमा संविधानले पनि बोलेको छ। केही हामीले अपनाउनुपर्ने विषय छ। मेरो सीमाभित्र रहेर मैले काम गर्नुपर्छ।’
राष्ट्रपति भण्डारीले विगतमा आफूले छोरीलाई अंश दिने कानूनी व्यवस्थाका लागि लबिङ गरेको पनि स्मरण गर्नुभयो । छोरीलाई अंश दिने प्रावधानलाई केही नेताहरुले नै उल्ट्याउन खोजेको र आफूले त्यसलाई रोकेको उहाँले बताउनुभयो ।
यस्तै, अहिले प्रदेश खारेज गर्ने आवाज उठेकोबारे राष्ट्रपति आफूले त्यसबारे धारणा बनाएको तर संविधानको रक्षक भएको नाताले बोल्न नमिल्ने बताउनुभयो ।
‘प्रदेशको संरचनाबारे प्रश्न उठेको छ। मैले धारणा नबनाई बसेको छ छैन’ उहाँले भन्नुभयो, ‘तर मैले व्यक्त गर्न जिम्मेवारीको हिसाबले उपयुक्त हुँदैन जस्तो लाग्छ।’
राष्ट्रपति भण्डारीले देशको आर्थिक अवस्था बिग्रँदै गएकोमासमेत गम्भीर चिन्ता व्यक्त गर्नुभयो । ‘अति भयो क्या । १७ खर्बको बजेट छ, १७ खर्बकै व्यापारघाटा हुन्छ ?’ राष्ट्रपतिको प्रश्न थियो ।
