मोरङ । मोरङको बुढीगंगा गाउँपालिका–१ का दीपेन्द्र यादवका एक वर्षीया छोरीको भारतबाट उद्धार गरिएको छ। अपहरणमा संलग्न रहेको अभियोगमा प्रहरीले बुधबार २ जनालाई पक्राउ गरेको छ ।
पक्राउ पर्नेहरूमा विराटनगर महानगरपालिका–६ रामपुर चोक बस्ने २७ वर्षीय रविन्द्र कुमार साह र सोही महानगरपालिका–५ कारखाना टोल बस्ने २७ वर्षीया अनु साह रहेका छन्।
घटनाका मुख्य योजनाकार रविन्द्र साह र अनु साहले ती बालिकालाई अपहरण गरी प्र.०१–०२०४६ प ७४१० नम्बरको मोटरसाइकलमा सप्तरीको राजविराज हुँदै कुनौली पुर्याई दरभंगा पठाएको प्रहरीले जनाएको छ ।
रविन्द्र साहले अनु साहको मोबाइल मार्फत पीडित परिवारलाई फेसबुक लगायत सामाजिक संजालमा बालिका हराएको कुरा पोस्ट गरेको हटाउन तथा अन्य विषयमा समेत धम्की दिएको प्रारम्भिक अनुसन्धानको क्रममा खुल्न आएको छ ।
साथै भारतको विहार दरभंगामा अनु साह बालिकालाई लिएर बस्दै आएकोमा नेपाल भारतको बोर्डर एरियाबाट १ नम्बर प्रदेश प्रहरी कार्यालयको अनुसन्धान समूह र जिल्ला प्रहरी कार्यालय मोरङबाट खटिएको संयुक्त टोलीले अपहरित बालिकालाई सकुशल उद्दार गरी अनु साहलाई प्रहरीले पक्राउ गरेको हो ।
साथै घटनामा संलग्न रविन्द्र साहलाई बुढिगंगा गाउँपालिका–१ स्थित उनले सञ्चालन गरेको श्रीराम ट्रेडर्सबाट प्रहरीले पक्राउ गरेको हो । उनीहरूबाट घटनामा प्रयोग भएको मोटरसाइकल, विभिन्न सामान र मोबाइलहरू प्रहरीले बरामद गरेको छ ।
बालिका अपहरण गर्ने अञ्जली बालिकाकै बुवा दिपेन्द्रकी प्रेमिका हुन् । साउन २ गते अञ्जलीले रोडशेष चौकबाट प्रेमी दीपेन्द्रलाई झुक्क्याएर बालिकालाई लिएर फरार भएकी थिइन्।
पेसाले मेकानिकल इन्जिनियर रहेका यादवको तीन वर्षअघि सप्तरी राजविराजकी ममता यादवसँग विवाह भएको थियो। छोरीलाई हजुरबुवाको जिम्मा लगाएर ममता बीबीए पढ्न काठमाडौँ गएकी थिइन् ।
