चन्द्रा श्रीस, काठमाडौँ ।
राष्ट्रिय जनमोर्चाको गुल्मी–काठमाडौँ सम्पर्क समितिको भेला सम्पन्न भएको छ । राजमो केन्द्रीय सदस्य घनश्याम न्यौपानेको प्रमुख आतिथ्यमा २०७९ असार ३२ गते बागबजारमा सो भेला सम्पन्न भएको हो ।
भेलाले वेगमबहादुर खड्का अध्यक्ष रहेको १३ पूर्ण र तीन सल्लाहकारसहितको गुल्मी–काठमाडौँ सम्पर्क समिति गठन गरेको छ । समितिको उपाध्यक्षमा ईश्वरीप्रसाद शर्मा, सचिवमा मुक्तबहादुर केसी, सहसचिवमा प्रकाश थापाक्षेत्री र कोषाध्यक्षमा चन्द्रा थापा रहनुभएको छ ।
त्यस्तै, सदस्यहरूमा प्रकाश थापामगर, बिमला थापा, कमला पौडेल, अशोक विश्वकर्मा, रेशमबहादुर बस्नेत, सूर्यबहादुर थापा र बलबहादुर पुलामी रहनुभएको छ । सदस्यको एक स्थान हाललाई रिक्त राखिएको छ ।
त्यसैगरी, सल्लाहकारमा प्राडा श्रीधर गौतम, लालबहादुर थापा र चूडामणि घिमिरे रहनुभएको छ ।
भेलाको उद्घाटन राजमो केन्द्रीय सदस्य घनश्याम न्यौपानेले ब्यानर पढेर गर्नुभएको थियो ।
सो अवसरमा मन्तव्य राख्दै उहाँले राजमोको सङ्गठन सुदृढीकरणमा सम्पर्क समितिहरूको गम्भीर महत्त्व रहने हुनाले राजमो केन्द्रीय समितिले सम्पर्क समितिप्रति जोड दिएको बताउनुभयो ।
नेकपा (मसाल) का प्रवक्ता रामप्रकाश पुरीले क्रान्ति कसैको व्यक्तिगत चाहनाले मात्र हुने नभएकाले त्यसका लागि धैर्यता आवश्यक रहेको बताउनुभयो । उहाँले सम्पर्क समितिले जिल्ला र राजधानीमाझको सम्बन्ध जोड्ने गरेको पनि स्मरण गर्नुुभयो ।
भेलामा अखिल नेपाल बुद्धिजीवी सङ्घका अध्यक्ष प्राडा श्रीधर गौतम, अखिल नेपाल जनजाति सम्मेलनका अध्यक्ष निमबहादुर बुढाथोकी र
अखिल (छैठौँ) का उपाध्यक्ष गणेश अधिकारीले शुभकामना मन्तव्य राख्नुभएको थियो ।
भेलाको अध्यक्षता लालबहादुर थापाले र सञ्चालन प्रकाश थापमगरले गर्नुभएको थियो ।
