काठमाडौं । जनता समाजवादी पार्टीले संघीय परिषद अध्यक्ष डा. बाबुराम भट्टराईसहित नौ जना नेतालाई कारबाही गरेको छ ।
वीरगन्जमा दुई दिनदेखि जारी केन्द्रीय समिति बैठकले कार्यकारिणी सदस्यहरु डा. भट्टराई, हिसिला यमी, गंगानारायण श्रेष्ठ, रमेश यादव, डम्बर खतिवडा, गोविन्द चौधरी र महिन्द्र राय यादवलाई पदबाट हटाउने निर्णय गरेको हो ।
जसपा नेता रकम चेमजोङका अनुसार काठमाडौं भेलामा सहभागी ती नेताहरुलाई पार्टी अनुशासन उल्लंघन आरोपमा जिम्मेवारीबाट हटाउने निर्णय भएको हो।
बैठकले संघीय परिषद अधयक्ष डा. भट्टराईलाई हटाएर वरिष्ठ नेता अशोक राईलाई सो पदमा चयन गरेको छ ।
जसपा विधानमा संघीय परिषद अध्यक्ष र केन्द्रीय अध्यक्ष रहने व्यवस्था छ । बाबुराम भट्टराईले जसपा पुनर्गठन गर्ने गरी २८, २९ असारमा केन्द्रीय समितिको बैठक राखेपछि बहुमत पक्षले भट्टराई लगायतका नेतालाई कारबाही गरेको हो ।
उपेन्द्र यादव एकल अध्यक्ष जसपाले अब उपेन्द्र यादवलाई एकल अध्यक्ष बनाएको छ । बैठकले विधान संशोधन गरी एकल अध्यक्षात्मक व्यवस्था गरेको हो ।
यसअघि जसपामा दुई अध्यक्षको व्यवस्था थियो । १ साउन २०७८ मा जसपा विभाजन गरी महन्थ ठाकुरले लोकतान्त्रिक समाजवादी पार्टी (लोसपा) गठन गरेपछि एउटा अध्यक्ष पद रिक्त थियो ।
