माधव खनाल, अर्घाखाँची ।
अखिल नेपाल जनजाति सम्मेलनका तत्कालीन केन्द्रीय सदस्य तथा अर्घाखाँची जिल्ला अध्यक्ष जितबहादुर रानाको छैठौं स्मृति दिवस मनाइएको छ ।
अखिल नेपाल जनजाति सम्मेलनद्वारा स्थापित ‘स्वर्गीय जितबहादुर राना स्मृति प्रतिष्ठान’ ले आइतबार भूमिकास्थान नगरपालिकामा छैठौंँ स्मृति सभाको आयोजना गरेको हो ।
कार्यक्रमलाई सम्बोधन गर्दै अखिल नेपाल जनजाति सम्मेलनका केन्द्रीय अध्यक्ष निमबहादुर बुढाथोकीले जितबहादुर रानाको अभाव आज पनि सिंगो जनजातीले महसुस गरिरहेको बताउनुभयो ।
रानाको निधन भएको ६ वर्ष भैसक्दा पनि जनजाति आन्दोलनमा उहाँको अभाव महसुस भएको उहाँको भनाई थियो ।
जितबहादुर राना स्मृति प्रतिष्ठानले भूमिकास्थान नगरपालिका– १ राजिमेमा २०७८ सालको वार्षिक परीक्षामा उत्कृष्ट अंक ल्याउने विद्यार्थीहरुलाई सम्मान तथा पुरस्कार वितरणसमेत गरेको छ ।
कार्यक्रममा राष्ट्रिय जनमोर्चाका केन्द्रीय सदस्य तथा भूमिकास्थान नगरप्रमुख झविलाल थापा, अखिल नेपाल जनजाती सम्मेलनकी केन्द्रीय सदस्य उषा पुन, राष्ट्रिय जनमोर्चा अर्घाखाँची जिल्ला सदस्य भोजराज खनाल, मेघराज खनाल, भूमिकास्थान नगर कार्यपालिका सदस्य खुमा बेल्बासे (माधवा), अखिल नेपाल शिक्षक संघका रामप्रसाद खनाल, कृष्णप्रसाद खनाल, देउराली आधारभूत विद्यालयका प्रधानध्यापक उमाकान्त खनाल, विद्यालय व्यवस्थापन समितिका अध्यक्ष वीरबहादुर घर्ती लगायतको उपस्थिति रहेको थियो ।
कार्यक्रम जितबहादुर रानाकी श्रीमती ज्ञानिमाया रानाको अध्यक्षता र जनजाति सम्मेलनका महासचिव अम्मरध्वज रानाको सञ्चालनमा सम्पन्न भएको थियो ।
जितबहादुरको २०७३ साल असार २६ गते ६४ वर्षको उमेरमा निधन भएको थियो । उहाँका श्रीमती, दुई छोरा, बुहारी एक छोरी र नातिनातिना हुनुहुन्छ ।
