बाजुरा । बाजुराको बुढीगंगा नगरपालिकाको नेकपा एमाले विजयी भएको छ । असार २३ गते भएको स्थानीय निर्वाचनको अन्तिम मतगणना अनुसार मेयर उपमेयरसहित सातवटा वडामा एमाले विजयी भएको छ भने तीन वटामा नेपाली कांग्रेसले जितेको छ ।
एमालेका रणबहादुर बानियाँ ४७ सय ७७ मतसहित विजयी भएका हुन्। उनका निकटतम प्रतिद्वन्द्वी सत्ता गठबन्धनबाट नेपाली कांग्रेसका रंगबहादुर खाती ३७ सय ७४ मतसहित पराजित भएका छन्।
त्यसैगरी उपमेयरमा पनि एमालेकै उम्मेदवार मायाकुमारी खड्का (कुँवर) ४७ सय २७ मतसहित विजयी भएकी छन्। उनकी निकटतम् प्रतिद्वन्द्वी नेपाली कांग्रेसकी रीताकुमारी शाहीले ३७ सय ५५ मत ल्याइन्।
१० वटा वडा रहेको बुढीगंगामा एमालेले सातवटा वडामा प्यानलसहित जित दर्ता गराउँदा कांग्रेसले तीनवटा वडामा जित निकालेको छ।
गत वैशाख ३० गते भएको निर्वाचनका क्रममा यहाँ एमालेमाथि धाँधली आरोप लागेको थियो । त्यसपछि निर्वाचन आयोगको टोलीले स्थलगत अध्ययन गरेर पुनः निर्वाचन गर्नुपर्ने निष्कर्ष निकालेको थियो।
