जनकपुरधाम । ६ वटा प्रदेशका गृहमन्त्रीले संघीय सरकारविरुद्ध कडा कदम चाल्ने चेतावनी दिएका छन्। कर्णाली प्रदेशबाहेकका गृहमन्त्रीहरुको जनकपुरमा भएको भेलाबाट प्रहरी समायोजन ऐन कार्यान्वयन नगरेको भन्दै संघीय सरकारविरुद्ध कडा कदम चाल्ने चतावनी दिएका हु्न् ।
जनकपुरमा बिहीबार मधेश प्रदेश सरकारको गृह तथा सञ्चार मन्त्रालयले आयोजना गरेको शान्ति सुरक्षा तथा विपद व्यवस्थापन सम्बन्धी अन्तर प्रदेश अनुभव आदान प्रदान कार्यक्रममा प्रदेश मन्त्रीहरु केन्द्रीय सरकारविरुद्ध एकमत देखिएका हुन् ।
संघीय सरकारले प्रहरी समायोजन ऐन कार्यान्वयन गर्न नचाहँदा प्रदेशका जनतालाई शान्तिसुरक्षाको प्रत्याभूति दिलाउन नसकेको मन्त्रीहरुले गुनासो गरे ।
मधेश प्रदेशका गृह तथा सञ्चारमन्त्री भरतप्रसाद साहले सातवटै प्रदेश गोलबन्द भएर चरणवद्ध आन्दोलन गर्ने चेतावनी दिए। उनले आफूहरुको शान्तिपूर्ण तरिकाबाट संघीय सरकारले प्रहरी समायोजन गरी माग सम्बोधन नगरे संघ सरकारको सुरक्षाकर्मीलाई चौकी चौकीबाट बाहिर निकाल्ने कडा चेतावनी दिए।
प्रदेश १ का आन्तरिक मामिला तथा कानुनमन्त्री केदार कार्की भने, ‘संघीयता विरोधी तथा एकात्मक सोच भएकाहरुलाई सन्देश दिन यहाँ भेला भएका हौँ’ मन्त्री कार्कीले भने, ‘जनकपुर घोषणापत्र जारी पछि दबाब सिर्जना गर्न मुख्यमन्त्री र मन्त्रीहरु काठमाडौं जाऔँ ।’
कार्यक्रममा बागमती प्रदेश सरकाका आन्तरिक मामिलामन्त्री कृष्ण प्रसाद खनाल, गण्डकी प्रदेशका आन्तरिक मामिला मन्त्री डोबाटे विश्वकर्मा, लुम्बिनी प्रदेशका आन्तरिक मामिलामन्त्री तिलराम शर्मा, सुदूरपश्चिम सरकारका आन्तरिक मामिलामन्त्री रणबहादुर रावललगायतले आफ्नै प्रहरी प्रशासन नहुँदा प्रदेश सरकारलाई विपद व्यवस्थापनमा समेत चुनौती झेल्नु परेको बताएका थिए ।
कर्णाली प्रदेशबाहेकका सबै प्रदेशका गृहमन्त्रीको सहभागिता रहेको कार्यक्रममा मधेश प्रदेशका मुख्यमन्त्री लालबाबु राउतको प्रमुख आतिथ्यमा थियो ।
