काठमाडौं । विवादकै कारण प्रतिनिधिसभामा विचाराधीन रहेको नागरिकतासम्बन्धी विधेयक फिर्ता लिने सरकारले निर्णय गरेको छ ।
मंगलबार बसेको मन्त्रिपरिषद्को बैठकले यसअघि संसदमा दर्ता भएको नागरिकता विधेयक फिर्ता लिएर संशोधित विधेयक दर्ता गर्ने निर्णय गरेको हो ।
सरकारले २०७५ सालमै ल्याएको नागरिकता विधेयकमा प्रतिनिधिसभाको राज्य व्यवस्था तथा सुशासन समितिले छलफल सकेर बहुमतले प्रतिवेदन पारित गरी प्रतिनिधिसभा बैठकमा पेश गरिसकेको छ । तर उक्त विधेयकमा नेपाली पुरुषसँग विवाह गरेर आउने विदेशी महिलालाई तत्कालै नागरिकता दिने वा ७ वर्षपछि दिने भन्ने विषयमा विवाद छ ।
संसदीय समितिले विदेशबाट विवाह गरेर आउने बुहारीलाई सात वर्षपछि नागरिकता दिने प्रावधान हटाएर विवाह गर्नासाथ नागरिकता दिने गरी विकेयक ल्याउने सरकारको तयारी रहेको स्रोतले जनाएको छ ।
नागरिकता विधेयक रोकिएकै कारण जन्मका आधारमा नेपाली नागरिकता पाएका नागरिकको सन्तानले नागरिकता पाउनबाट बञ्चित भएका भन्दै तत्काल नागरिकता विधेयक ल्याउन सरकारमाथि मधेशवादी दलहरुले दबाब दिइरहेका छन्।
