काठमाडौं । नेकपा (माओवादी केन्द्र) का वैकल्पिक केन्द्रीय सदस्य खडक राना राष्ट्रिय जनमोर्चामै फर्किनु भएको छ । रानाले मंगलबार एक विज्ञप्ति प्रकाशित गरी आफू राजमोमै फर्किएको बताउनुभएको हो ।
यही असार १३ गते रानालाई माओवादी केन्द्रका अध्यक्ष पुष्पकमल दाहाल प्रचण्डले पार्टी प्रवेश गराएका थिए । लगत्तै रानालाई माओवादी केन्द्रको वैकल्पिक केन्द्रीय सदस्य बनाइएको थियो ।
हाल माओवादी केन्द्रको केन्द्रीय समिति बैठक बसिरहेको छ । तर, राना बैठकमा आउनुभएको छैन ।
युगदर्शनसँगको सम्पर्कमा रानाले राष्ट्रिय जनमोर्चा छोड्ने भनेको राजनीतिक रुपमा खत्तम हुनु हो भन्ने महसुस भएरै आफू बैठकमा नगएको बताउनुभयो ।
‘गत स्थानीय चुनावले म मा अलिक निराशा पैदा भयो । त्यही बेला माओवादीका अलिक टाठाबाठा मान्छे आएर कन्भिस गरे र हाम फालेँ’ रानाले भन्नुभयो, ‘तर, त्यही दिनदेखि आफूले गलत गरेको महसुस भयो । राष्ट्रिय जनमोर्चाबाट जसले खुट्टा उठायो, त्यो बिग्रियो भन्ने लाग्यो । अहिलेसम्म त्यही देखिएको छ ।’
राना पार्टीमा फर्किएपछि आफ्ना पुराना सकहर्मीहरु आरसी भट्ट, नन्दराज भट्ट र हरिकृष्ण पाण्डेसँगै खिचाएको फोटो सामाजिक सञ्जालमा राख्दै राजमो केन्द्रीय सचिवालय सदस्य भट्टले लेख्नुभएको छ, ‘हामी सँगै छौँ । भात छुटेगा साथ नहीँ छुटेगा ।’
