काठमाडौं । नागरिक अगुवाहरुले अर्थमन्त्री जनार्दन शर्मालाई पदमा बस्न नैतिकताले नमिल्ने बताएका छन् । पूर्वप्रधानन्यायाधीश सुशीला कार्की, त्रिभूवन विश्वविद्यालयका पूर्व उपकुलपति केदारभक्त माथेमा र नागरिक अगुवा डा. गोविन्द केसीले सोमबार संयुक्त विज्ञप्ति जारी गरी अर्थमन्त्रीलाई नैतिकताको आधारमा राजीनामा गर्न भनेका छन् ।
बजेट निर्माणमा अनधिकृत व्यक्तिको संलग्नता गराएको भन्दै अर्थमन्त्री जर्नादन शर्माले राजीनामा दिनुपर्ने नागरिक अगुवाहरुको भनाई छ ।
विज्ञप्तिमा भनिएको छ, ‘‘आधारभूत नैतिकता समेत गुमाएका व्यक्तिहरु मन्त्री पदमा बसिरहँदा त्यो पदको समेत गरिमा खण्डित हुने र सरकारको छवि थप धमिलिने देखिन्छ । हाल सत्तासिन दलका विभिन्न पदाधिकारी र नेताहरुले सिर्जना गरेको आर्थिक तथा न्यायीक अराजकताबारे हाम्रो गम्भीर ध्यानाकर्षण भएको छ ।’
अर्थमन्त्री शर्माले मन्त्रालयको सीसीटीभी फुटेज हटाएर अराजकता र दण्डहीनता देखाएको भन्दै त्यो स्वीकार्य नहुने उनीहरुले बताएका छन् ।
‘अर्थमन्त्रीले चित्तबुझ्दो जवाफ नदिएको पृष्ठभूमिमा अहिले त्यो समयको सिसिटीभी फुटेज गृह मन्त्रालयले जारी गरेको सिसिटीभी जडान तथा सञ्चालन कार्यविधि २०७२ को प्रतिकुल हुनेगरी असमयमै हटाइएको कुरा आएको छ, यस्ता अराजकता र दण्डहीनता कुनै पनि नेपाली नागरिकलाई स्वीकार्य हुन सक्दैन,’ विज्ञप्तिमा उल्लेख छ ।
नागरिक अगुवाहरुले निजगढ अन्तराष्ट्रिय विमानस्थलबारे सर्वोच्चको फैसला स्मरण गराउँदै विमानस्थल निर्माण गर्दा न्यायालयको आदेश प्रतिकूल वा मानहानी हुने कार्य नगर्न समेत सचेत गराएका छन्।
उनीहरुले सर्वोच्च अदालतले दिएको आदेशबारे शीर्ष नेताहरुले यथार्थ कुरा नबताएको भन्दै असन्तुष्टि व्यक्त गरेका छन् ।
‘निजगढ भ्रमणमा सत्ता गठबन्धनका नेताहरुले त्यहाँ विमानस्थल बनाउँछौं भनेको तर सर्वोच्च अदालतले कायम गरेको बन्देज र दिएको आदेश पालना गर्ने कुरा खुलेर भनेका छैनन्, त्यसमा हाम्रो गम्भीर आपत्ति छ।’ विज्ञप्तिमा भनिएको छ।
