काठमाडौं । गएको मंगलबार (असार १४ गते) मात्र नयाँ दल घोषणा गरेका वामदेव गौतमले विभिन्न दलका शीर्ष नेतासँग भेटघाट गर्नुभएको छ ।
‘नेपाल कम्युनिस्ट पार्टी एकता राष्ट्रिय अभियान’ का संयोजक गौतम विभिन्न वामपन्थी पार्टीका प्रमुखसँग भेटवार्तामा सक्रिय हुनुभएको हो ।
गौतमले बिहीबार नेकपा (एमाले) का अध्यक्ष केपी शर्मा ओली, नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपाललाई उहाँहरुकै निवासमा पुगेर भेट्नुभएको हो ।
बिहीबार साँझ नेपाललाई पनि उहाँकै निवास (कोटेश्वर) पुगेर भेट गरेका गौतमले भेटवार्ता सकारात्मक भएको गौतमको सचिवालयले जनाएको छ ।
यस्तै, गौतमसँगको भेटवार्तामा प्रचण्ड उत्साहित भएको र ओली मौन रहेको बताइएको छ ।
तत्कालिन नेकपा विभाजन भएर एमाले र माओवादी अलग भएदेखि नै पार्टी एकताका लागि अभियान सञ्चालन गर्दै आएका गौतमले मंगलबार नेपाल कम्युनिष्ट पार्टी एकता राष्ट्रिय अभियान नामक छुट्टै पार्टी घोषणा गर्नुभएको हो ।
