काठमाडौं । राष्ट्रिय जनमोर्चाका अध्यक्ष चित्रबहादुर केसीले आफूलाई कम्युनिष्ट भन्नेहरुबाटै सबैभन्दा बढी गणतन्त्रमाथि खतरा उत्पन्न भएको बताउनुभएको छ ।
नरबहादुर कर्माचार्य स्मृति प्रतिस्ठानले सोमबार राजधानीमा आयोजना गरेको ‘नेपालमा समाजवाद चुनौती र सम्भावना’ विषयक अन्तरक्रिया कार्यक्रममा केसीले नेपालमा गणतन्त्र जोगाउने चुनौती थपिएको बताउनुभएको हो ।
नेपाललाई पुनः हिन्दु राज्य बनाउन जोड भइरहेको भन्दै अध्यक्ष केसीले पाँच दलबीच नै गणतन्त्र, राष्ट्रियता र सार्वभौकिताप्रति एकता नभएको बताउनुभयो ।
केसीले देशको सार्वभौमसत्ता संकटमा परेको चर्चा गर्नुभयो । आफूलाई कम्युनिष्ट भन्नेहरुबाटै सबैभन्दा धेरै गैरकम्युनिष्ट काम भएको उहाँको भनाई थियो ।
‘कम्युनिष्टको खोल ओढेर गैरकक्युनिष्ट काम भयो । बिचमा कम्युनिष्ट मिलेको होइन ?’ उहाँले भन्नुभयो, ‘तर पचेन । धान्न सकेनौ । गणतन्त्र सिध्याउन भूमिका खेल्ने कम्युनिष्ट एकता किन चाहियो ?’
कार्यक्रममा नेकपा (माओवादी केन्द्र)का अध्यक्ष पुष्पकमल दाहाल प्रचण्ड र नारायणकाजी श्रेष्ठ, नेकपा (एकीकृत समाजवादी) का सम्मानित नेत झलनाथ खनाल, नेकपा (एमाले) का महासचिव शंकर पोखरेल, नेपाली कांग्रेसका वरिष्ठ नेता रामचन्द्र पौडेल, जनता समाजवादी दलका अध्यक्ष उपेन्द्र यादव लगायत सहभागी छन् ।
कार्यक्रममा अध्यक्ष केसीले संघीयताको भारी बोके र देशका युवालाई विदेश पठाएर देशमा समाजवाद नआउने बताउनुभयो ।
संघीयताप्रति चित्रबहादुर केसी स्पष्टः यादव
अध्यक्ष केसीपछि बोलेका जनता समाजवादी पार्टी नेपाल (जसपा) का अध्यक्ष उपेन्द्र यादवले संघीयतावादीबाटै संघीयतामाथि प्रहार भएको बताउनुभयो ।
देशमा संघीयतामा गए पनि एकात्मक प्रणालीकै अभ्यास भएको बताउनुभयो । उहाँले नेताहरुमा संघीयताप्रति विश्वास नभएको आरोप पनि लगाउनुभयो ।
‘एकात्मक प्रणाली अभ्यास भयो । प्रदेश नाम मात्रकै भए’ उहाँले भन्नुभयो, ‘संघीयतामा विश्वास नभएको हो की, हाम्रा साथीहरुले संघीयतालाई भित्र भित्र कुहाउन खोज्दै हुनुहुन्छ । बरु यसमा चित्रबहादुर केसी प्रस्ट हुनुहुन्छ।’
