काठमाडौं । भारतको नयाँ दिल्लीबाट दुई दिनअघि छुटेको ‘भारत गौरव पर्यटक रेल’ आज जनकपुरधाम आइपुग्दै छ। रेल करिब पाँच सुय धार्मिक पर्यटक लिएर आज दिउँसो १ः३० बजे जनकपुरधाम आइपुग्ने जनाइएको छ।
रेल मंगलबार साँझ ७ बजे भारतको नयाँ दिल्लीबाट छुटेको थियो । धार्मिक सांस्कृतिक प्रवर्द्धनका लागि सो रेल रामायण सर्किट हुँदै जनकपुरधाम आउन लागेको हो।
रेल चढेर आउने तीर्थ यात्रीलाई जनकपुरधाममा भव्य स्वागत गर्ने तयारी गरिएको छ ।
मधेश सरकारको उद्योग पर्यटन तथा वन मन्त्रालय, जनकपुरधाम उपमहानरपालिका र जानकी मन्दिरले तीर्थयात्रीको स्वागतको तयारी गरेका छन्।
जनकपुर आइपुग्ने तीर्थयात्रीलाई रेल्वे स्टेशनमा मधेशका मुख्यमन्त्री लालबाबु राउत, पर्यटनमन्त्री सत्रुधन महतोसहितका मन्त्री, जनकपुरधाम उपमहानगरपालिकाका मेयर मनोजकुमार साह र जनकी मन्दिरका साह महन्त रामरोशन दास लगायतले रेल चढेर आउने तीर्थयात्रीहरुलाई स्वागत गर्ने कार्यक्रम तय भएको छ।
उनीहरुको लागि जनकपुरधामको विभिन्न होटेल भारतीय राजदूतावासले व्यवस्था गरेको छ। भारतीय तीर्थयात्रीले जनकपुरधामका विभिन्न धार्मिक क्षेत्रको अवलोकन गर्नुका साथै धार्मिक कार्यक्रममा सहभागी हुने छन् ।
जनकपुरबाट बस चढेर सीतामढी पुग्ने तीर्थ यात्रीलाई लिएर त्यहाँबाट रामायण सर्किट हुँदै दिल्ली फर्किने जनाइएको छ।
सो रेलको दुईवटा डिब्बालाई विशेष रुपमा योग सम्बन्धी तस्वीर तथा सामग्रीले सजाइएको उक्त रेलमा १४ वटा डिब्बा हुनेछन्। जसमध्ये केही डिब्बाका बाहिरी भागमा भारतका विभिन्न शास्त्रीय एवम् लोक नृत्य, पोशाक, पर्व, परिकार प्रवर्द्धन गर्ने किसिमका सामग्री देख्न सकिन्छ।
