दाङ । अखिल नेपाल किसान महासंघ जिल्ला समिति दाङले खेती गर्ने बेला मलको अभाव भएकोले तत्काल व्यवस्था गर्न माग गर्दै सरकारलाई ञापन पत्र बुझाएको छ ।
सोमबार जिल्ला प्रसासन कार्यालय दाङ मार्फत सरकारलाई बुझाइएको ज्ञापन पत्रमा किसानहरुले खेती गर्ने बेला भएकोले अबिलम्ब मलको व्यवस्था गर्नु पर्ने, मलको दीर्घकालिन समस्या समाधान गर्न मल उद्योगको स्थापना गर्नु पर्ने, रासायनिक मलमा अनुदान थप्नु पर्ने, रासायनिक मलको ठाउँमा कम्पोस्ट मल प्रयोग गर्न उत्प्रेरणा दिनु पर्ने, सहरको फोहोरबाट कम्पोस्ट मल बनाउनु पर्ने लगायतका माग गरिएको छ।
यस्तै, किसान संघले किसानको उत्पादित वस्तुको बजार व्यवस्थापन गर्नु पर्ने, कृषि उत्पादन हुने जमिन प्लानिङ र खण्डिकरण हुनबाट रोक्नु पर्ने, कृषि कर्जा सहज रुपमा पाउने वातावरण निर्माण गर्नु पर्ने, भू–उपयोग नीति लागू गर्नु पर्ने, किसान पेन्सनको व्यवस्था गर्नु पर्ने, कृषि बीमा निशुल्क गर्नु पर्ने, हरेक स्थानीय तहमा कोल्ड स्टोरको व्यवस्था हुनु पर्ने, बिऊ बिजन स्वदेशमै उत्पादन गर्नु पर्ने, सिंचाइमा लागेको विद्युत महसुलमा छुट गर्नु पर्ने लगायतका माग अगाडि सारेको छ ।
प्रमुख जिल्ला अधिकारी हिरालाल रेग्मीले ज्ञापनपत्र बुझ्दै यसलाई गृह मन्त्रालयमा पठाउने र आवस्यक व्यवस्थाको लागि पहल गर्ने बताउनु भयो ।
उक्त ज्ञापनपत्र किसान संघका जिल्ला अध्यक्ष ऋषिराम पौडेलले वाचन गरि प्रजिअ रेग्मीलाई हस्तान्तरण गर्नु भएको थियो ।
ज्ञापनपत्र बुझाउन अखिल नेपाल किसान महासंघका केन्द्रीय कोषाध्यक्ष प्रेमनारायण आचार्य, राष्ट्रिय जनमोर्चाका जिल्ला अध्यक्ष गणेश आचार्य, अखिल नेपाल किसान महासंघका जिल्ला कोषाध्यक्ष खिमानन्द खनाल, जिल्ला सदस्य मनिराम खनाल, खडानन्द खनाल, हरी खरेल, सुरेश कुमार पान्डे, दिनेश रैदाश लगायत नेता कार्यकर्ता जानु भएको थियो ।
