वीरगञ्ज । नेपाली काङ्ग्रेसका प्रवक्ता डा प्रकाशशरण महतले नेकपा (एमाले) ले अमेरिकाको स्टेट पार्टनरसीप प्रोग्राम (एसपिपी) लाई चुनावी एजेन्डा बनाउन खोजेको बताउनुभएको छ ।
नेपाल प्रेस युनियन पर्साले २०७९ असार ५ गते वीरगञ्जमा आयोजना गरेको पत्रकार सम्मेलनमा काङ्ग्रेस प्रवक्ता डा महतले यो धारणा राख्नुभएको हो ।
उहाँले भन्नुभयो– ‘ओली सरकारकै पालामा यसमा पत्राचार भएको रहेछ र त्यो खुलिसकेको पनि छ तर एजेन्डाविहीन बनेको एमालेले एसपिपीलाई आगामी संसदीय निर्वाचनको एजेन्डा नै बनाउन खोज्यो ।’
प्रवक्ता डा महतले नेकपा (एमाले) गत स्थानीय तहको निर्वाचनपछि एजेन्डाविहीन बनेको र त्यसैले सरकारका विरुद्धमा आगामी संसदीय निर्वाचनलाई लक्ष्य गरेर विभिन्न अनर्गल प्रचारमा लागेको उहाँको आरोप थियो ।
पूर्वपरराष्ट्र मन्त्रीसमेत रहनुभएका प्रवक्ता डा महतले नेपालले कुनै देश या समय हेरेर नभई स्थायी र सन्तुलित परराष्ट्र नीति सञ्चालन गर्नुपर्नेमा जोड दिनुभयो ।
