काठमाडौं । प्रतिनिधिसभा अन्तर्गतको अन्तर्राष्ट्रिय सम्बन्ध समितिले बोलाएको बैठकमा प्रधानमन्त्री शेरबहादुर देउवा उपस्थित हुनुभएको छैन । समितिले आज देउवालाई बैठकमा बोलाएको थियो ।
प्रधानमन्त्रीको अमेरिका भ्रमण र विवादित अमेरिकी स्टेट पार्टनरसिप प्रोग्राम (एसपीपी) बारे छलफल गर्न बोलाएको बैठकमा देउवा अनुपस्थित हुनुभएको हो ।
तत्कालिन प्रधानसेनापति राजेन्द्र क्षेत्रीले अमेरिकी सैनिक गठबन्धन एसपीपीमा नेपाली सेनालाई सामेल गर्न लेखेको पत्र बाहिरिएपछि संसदको अन्तर्राष्ट्रिय सम्बन्ध समितिले सरोकारवालालाई बोलाएर छलफल गरिरहेको छ ।
समितिमा यसअघि शुक्रबार परराष्ट्रमन्त्री डा. नारायण खड्का र प्रधानसेनापति प्रभुराम शर्माले जवाफ दिइसक्नुभएको छ । समितिले आज देउवालाई बोलाएको हो ।
प्रधानमन्त्री यही महिनाको अन्तमा र प्रधानसेनापति केही दिनमै अमेरिका जाने कार्यक्रम छ । अमेरिकाले भने एसपीपीमा सामेल हुन नेपालले नै माग गरेको भन्दै हस्ताक्षर गर्न दबाब दिइरहेको छ ।
यसअघि संसदमा जवाफ दिने बेलामा पनि प्रधानमन्त्री देउवा उपस्थित हुनुभएको थिएन ।
त्यस्तै, समितिका सदस्यसमेत रहेका पूर्वप्रधानमन्त्री एवम् एकीकृत समाजवादीका अध्यक्ष माधव कुमार नेपाल पनि बैठक सुरु नहुँदै बाहिरिनु भएको छ । बैठकस्थलमा पुगेका नेपाल ‘मेरो बाहिर मिटिङ छ’ भन्दै बाहिरिनुभएको हो ।
