काठमाडौं । नेपालको औपचारिक भ्रमणमा रहेका संयुक्त राज्य अमेरिकाको एशिया प्रशान्त कमान्डका कमाण्डर जनरल चार्ल्स ए फ्लेन सहितको भ्रमणदलका सदस्यहरुले आइतबार पाँचखालस्थित नेपाली सेनाको वीरेन्द्र शान्ति कार्य तालिम केन्द्र र शिवपुरीस्थित सैनिक कमाण्ड तथा स्टाफ कलेजको भ्रमण गरेका छन्।

पाँचखालस्थित वीरेन्द्र शान्ति कार्य तालिम केन्द्रको भ्रमणका दौरान तालिम केन्द्रका केन्द्रपतिबाट उक्त भ्रमणदललाई वस्तुस्थिति लगायत विविध पक्षको बारेमा जानकारी गराएको नेपाली सेनाले जनाएको छ ।

उक्त भ्रमणदलले शान्ति स्थापना कार्यको दौरान आवश्यक पर्ने विभिन्न प्रदर्शनीको अवलोकन समेत गरेका थिए।
साथै, अन्तरक्रियाका दौरान नेपाली सेनाका रथी तथा अधिकृतहरु र उक्त भ्रमणदलका सदस्यहरुबीच संयुक्त राज्य अमेरिकाबाट शान्ति स्थापना कार्यको लागि प्राप्त सहयोग भविष्यमा थप वृद्धि गर्दै लैजाने लगायत विविध विषयमा छलफल भएको थियो ।

तत्पश्चात, उक्त भ्रमणदलले शिवपुरीस्थित सैनिक कमाण्ड तथा स्टाफ कलेजको भ्रमण गरेको थियो ।

उक्त भ्रमणको दौरान जनरल फ्लेनद्वारा सो कलेजका शिक्षाध्यक्षसँग भेटघाट तथा तालिमरत शिक्षार्थी अधिकृतहरुसँग अन्तरक्रिया गर्नुका साथै उनले कलेज परिसरमा वृक्षारोपण समेत गरेका थिए। नेपाली सेनाका रथीवृन्द तथा अधिकृतहरुको उपस्थिती रहेको उक्त कार्यक्रममा फ्लेनले नेपाली सेना एउटा भरपर्दो जमिनी शक्ति भएको र संसारकै पूरानो सेनाहरु मध्ये एक रहेको समेत बताए।

नेपालको चारदिने औपचारिक भ्रमण सम्पन्न गरी उक्त भ्रमणदल आजै स्वदेश फिर्ता हुने कार्यक्रम रहेको छ।