काठमाडौँ । काठमाडौंको फोहोर लिएर बन्चरेडाँडा पुगेका दर्जनौँ ट्रकलाई स्थानीयले फर्काइदिएका छन् ।
बुधबार प्रहरी परिचालन गरेर लगिएका ट्रकलाई स्थानीयबासीले ढुंगामुढा गरेर प्रतिरोध गरेका थिए । फोहोर बोकेर गएका ट्रक स्थानीयको अवरोधपछि बन्चरेडाँडा पुग्नै सकेनन् ।
स्थानीयबासी प्रतिकारमा उत्रिएपछि सुरक्षामा खटिएका प्रहरीले दुई राउन्ड अश्रु ग्यास पनि हानेका थिए।
त्यसक्रममा सडकमाथि उक्लिएका स्थानीयले ढुंगामुढा गर्दा तीनजना प्रहरी घाइते भएका महानगरीय प्रहरी परिसरले जनाएको छ ।
बन्चरेडाँडामा फोहोर लैजानका लागि यसअघि सहरी विकास मन्त्री रामकुमारी झाँक्रीको उपस्थितिमा काठमाडौं महानगरपालिका तथा धादिङको धुनीबेंसी नगरपालिका र नुवाकोटको ककनीका जनप्रतिनिधिबीच सम्झौता भएको थियो ।
तर त्यो सम्झौता वार्तामा आफूहरूलाई सहभागी नगराएको भन्दै स्थानीयबासी प्रतिकारमा उत्रिएका हुन् । उनीहरुले फोहोर बिसर्जन गर्ने भए १० अर्ब रुपैयाँ मुआब्जा दिनुपर्ने माग गरेका छन् ।
विगत ११ दिनदेखि उपत्यकाका १८ स्थानीय तहको फोहर व्यवस्थापन गर्न नसक्दा दुर्गन्ध फैलिएको छ भने आवतजावत गर्नसमेत समस्या भइसकेको छ ।
