नवलपरासी । राष्ट्रिय जनमोर्चाका अध्यक्ष चित्रबहादुर केसीले प्रतिगमनलाई निस्तेज पार्न गठबन्धनको निरन्तरता आवश्यक रहेको बताउनुभएको छ ।

राष्ट्रिय जनमोर्चा नवलपरासी, शनिबार सुनवलमा आयोजना गरेको जिल्लास्तरीय चुनावी समीक्षा भेलालाई सम्बोधन गर्दै अध्यक्ष केसीले प्रतिगमनको खतरा अझै टड्कारो रहेकोले पाँचदलीय गठबन्धनलाई निन्तरता दिनुपर्ने बताउनुभयो ।

‘प्रतिगमनको खतरा टरेको छैन । त्यसकारण आगामी प्रदेश र प्रतिनिधिसभाको चुनावमा पनि गठबन्धन आवश्यक छ’ केसीले भन्नुभयो ।
समीक्षा कार्यक्रममा अध्यक्ष केसीसँग कार्यकर्ताले स्थानीय चुनावमा राजमोले पाँचदलीय गठबन्धनमा सामेल भएपनि गठबन्धनका अन्य दलमा इमान्दारिता नदेखिएको गुनासो गरेका थिए ।

राजमो नेता तिलक प्रसाद सुवेदीका अनुसार सहभागीहरुले अध्यक्ष केसीसँग कांग्रेस–माओवादी इमान्दार नदेखिएकोले राजमोले गठबन्धनबारे विचार गर्नुपर्ने सुझाव दिएका थिए ।

जवाफमा अध्यक्ष केसीले गठबन्धनबाट पार्टीलाई कति फाइदा वा बेफाइदा भयो भन्न भन्दा पनि गठबन्धन राष्ट्रिय आवश्यकता भएको र प्रतिगमनलाई निस्तेज पार्न अरु उपाय तत्काल नभएकोले गठबन्धनमा सामेल हुनुपरेको जवाफ दिनुभएको थियो ।

‘राजमोबाहेक अन्य दल अवसरवादी र संसदलाई नै आफ्नो रणनीति बनाएका पार्टीहरु हुन् । त्यसकारण उनीहरु गठबन्धनप्रति पुरै इमान्दार हुन्छन् भन्ने होइन । चुनाव जितन जे पनि हर्कत अपनाउन तयार हुन्छन् । तर, हाम्रा लागि चुनावमा हारजित ठूलो कुरा होइन । प्रतिगमनलाई हराउन गठबन्धन गर्नुपर्ने राष्ट्रिय आवश्यकता हो’ अध्यक्ष केसीले भन्नुभयो, ‘२०६२/०६३ सालको जनआन्दोलनको उपलब्धि जोगाउन, संविधानको रक्षा, गणतन्त्र र धर्मनिरपेक्षता रक्षाको लागि गठबन्धन गर्नुपर्ने आवश्यकता परेको हो । गठबन्धन नभए यी उपलब्धि जोगाउन मुस्किल पर्ने अवस्था छ ।’

कार्यक्रममा केसीले चुनावमा आएको मतभन्दा पनि राष्ट्रिय राजनीतिमा पार्टीले खेलेको भूमिका र विचार जनतामा पुर्याउन सफल भएको भन्दै उच्च मनोबलका साथ अगाडि बढ्न कार्यकर्ताहरुसँग आग्रह गर्नुभयो ।

समीक्षा कार्यक्रममा राजमो लुम्बिनी प्रदेश सदस्य तिलक प्रसाद सुवेदीले समग्र जिल्लाको चुनावी गतिविधिको रिपोर्टिङ प्रस्तुत गर्नु भएको थियो ।
चुनावमा उम्मेदवारहरू शोभाकान्त लामिछाने, मेघराज गौतम, उत्तमराज खरेलले आ–आफना अनुभवहरु प्रस्तुत गर्नु भयो ।

कार्यक्रममा रक्तिम सांस्कृतिक अभियानका केन्द्रीय अध्यक्ष रेम राना, नेकपा (मसाल) जिल्ला प्रवक्ता धनपति सापकोटा, अखिल नेपाल महिला संघ जिल्ला अध्यक्ष सम्झना सुवेदीको आतिथ्यता रहेको थियो ।

राजमो जिल्ला अध्यक्ष किसन बहादुर अधिकारीको अध्यक्षता, सचिव ढुण्डिराज पोख्रेलको सञ्चालन र अखिल नेपाल किसान महासंघ जिल्ला अध्यक्ष जितबहादुर पौडेलको स्वागत मन्तव्यमा कार्यक्रम अघि बढेको थियो ।

नवलपरासीको बर्दघाट नगरपालिका वडा नं ५ मा राजमोले गठबन्धन गरेर एक जना सदस्य (शोभाकान्त लामिछाने) लाई जिताउन सफल भएपनि अन्य स्थानमा भने गठबन्धनबिना नै चुनावमा सहभागी भएको थियो ।