काठमाडौं । नेकपा (माओवादी केन्द्र) का वरिष्ठ नेता नारायणकाजी श्रेष्ठले अमेरिकी सहयोग मिलेनियम च्यालेन्ज कम्प्याक्ट (एमसीसी) खारेज गर्न माग गर्नुभएको छ ।
संसदले एमसीसी पास गर्दा चर्को विरोध गरेका श्रेष्ठले यो सम्झौता खारेज हुनुपर्ने दोहोर्याउनुभएको छ ।
सरकारले संसदमा प्रस्तुत गरेको आर्थिक वर्ष २०७९/८० को बजेटमाथि छलफलमा भाग लिँदै श्रेष्ठले अमेरिकाले १२ बुँदे ब्याख्यात्मक घोषणाबारे एक शब्द नबोलेको बताउनुभयो ।
‘यो एमसीसी योजना अन्तर्गत हो वा एमसीसी खारेज भएको अर्थमा बुझेर अर्थमन्त्रीले आफैँले प्रस्ताव राखेकोबारे जवाफ दिनुपर्छ। एमसीसी परियोजनाअन्तर्गत १२ बुँदे कार्यान्वयन गर्ने कुरामा अमेरिकाले सहमति नजनाए त्यही दिन यो खारेज हुने उल्लेख गरिएको छ’ श्रेष्ठले भन्नुभयो, ‘प्रशारण लाइन निर्माण अर्थमन्त्रीको व्यक्तिगत प्रस्ताव भएमा सरकार र अर्थमन्त्री धन्यवादको पात्र हुन सक्छन्। सरकारले यसबारे स्पष्ट पार्न आवश्यक छ।’
उहाँले १२ बुँदेबारे अमेरिका नबोल्नु एमसीसी खारेज भएको अर्थमा बुझ्नुर्ने होकि भनी व्यंग्य पनि गर्नुभयो । ‘त्यसकारण एमसीसी खारेज भएको अर्थमा बुझेर अर्थमन्त्रीले यसरी आफैँले गर्ने प्रस्ताव राख्नुभएको हो भने मेरो व्यक्तिगत तर्फबाट अर्थमन्त्री र सरकारलाई धन्यवाद छ । तर यो के हो प्रस्ट हुनुपर्छ,’ उहाँले भन्नुभयो ।
