काठमाडौं । काठमाडौं महानगरपालिकाको प्रमुखमा बालेन्द्र शाह निर्वाचित भएपछि सोमबार पहिलो बैठक बसेको छ । लाइभ गरिएको बैठकमा चर्काचर्कीबीच ५ निर्णय भएको छ ।
सोमबार शपथ ग्रहण लगत्तै महानगर कार्यालय बागदरबारमा बसेको कार्यपालिका बैठकमा सुरुमा एजेण्डा प्रस्तुत गरिएको थियो । ती एजेण्डाहरु अनुमोदन गर्ने बेलामा विवाद भएको हो ।
महानगरपालिकाका प्रमुख कार्यकारी अधिकृत लोकनाथ पौडेलले प्रस्तावै नगरिएको एजेण्डा निर्णय गर्न प्रस्ताव गरेको भन्दै वडाअध्यक्षहरुले आपत्ति जनाएका थिए ।
नेपाली कांग्रेसबाट वडा नम्बर १६ का वडाध्यक्ष निर्वाचित मुकुन्द रिजालले कार्यकारीले निर्णय भनेको भन्दै आपत्ति जनाउनुभयो ।
‘तपाईँ निर्णय गरेको भनेर किन भन्नुभएको ? एजेण्डा नै प्रस्ताव नगरी निर्णय कहिले भयो? यहाँ प्रस्ताव पेश नै भएको छैन, त्यसै निर्णय भन्ने?’ रिजालले भन्नुभयो, ‘निर्णय भन्ने शब्द फिर्ता लिनुस् ।’
बैठकमा मेयर शाह सान्त र नरम देखिएपनि कांग्रेस एमालेबाट निर्वाचि वडाअध्यक्ष भने आक्रोशित देखिन्थे भने मेयर/कार्यकारी अधिकृतमाथि हावी भएका थिए ।
बैठकले मेयरको अध्यक्षतामा ५/६ जना वडाअध्यक्ष रहनेगरी फोहोरमैला व्यवस्थापन सम्बन्धि समिति बनाउने निर्णय पनि पारित भयो तर, नाम उल्लेख भएको छैन ।
यस्तै, सार्वजनिक रेस्टुरेन्ट र पेट्रोल पम्पसँग सहकार्य गर्ने, महानगरबासीको गुनासो सुन्नको लागि कल सेन्टर स्थापना गर्ने, कल सेन्टर मार्फत् इन्फास्ट्रचर एम्बुलेन्स सञ्चालन (बाटो भत्केको तत्काल मर्मत), विविध ३१ नम्बर वडाको बाटो बनाउने लगायतका ६ निर्णय कार्यपालिका बैठकले गरेको छ ।
