काठमाडौं । तारा एयरको विमान दुर्घटनामा मृत्यु भएकाहरुको १० जनाको शव काठमाडौं ल्याइएको छ। मुस्ताङको कोवाङबाट पोखरा हुँदै नेपाली सेनाको हेलिकप्टरमार्फत शव ल्याइएको हो।
सोमबार बेलुका तारा एयरका प्रवक्ताले विज्ञप्ति जारी गरी ‘हालसम्म २२ मध्ये २१ जनाको शव फेला परेको तीमध्ये १० जनाको शव आधार शिविरमा ल्याइएको छ । ती शव नेपाली सेनाको हेलिकप्टरबाट काठमाडौं ल्याइएको जानकारी गराएको छ ।
‘शवहरु काठमाडौं ल्याइसकेपछि त्रिवि शिक्षण अस्पतालस्थित फरेन्सिक मेडिसिन विभागमा पोस्टमार्टमको लागि लगिनेछ’ ।
बाँकी १० वटा शव भने दुर्घटनास्थलमै छन्। मौसम खराबीको कारण अरु शव ल्याउन नसकिएको तारा एयरले जनाएको छ । उद्धार टोलीले एक जनाको शव खोजी गररहेको छ ।
त्यस्तै संकलित शवको पोष्टमार्टम गरेर आफन्तलाई जिम्मा लगाइने तारा एयरले जनाएको छ ।
पोखराबाट आइतबार बिहान ९ः५५ बजे जोमसोमका लागि उडेको तारा एयरको ९ एनएइटी कलसाइन भएको उक्त विमान बिहान १०ः०७ बजे जोमसोम विमानस्थलको टावरबाट सम्पर्क विच्छेद भएको थियो । जहाजमा चालक दलका तीनजना सदस्य, १२ जना नेपाली, चार जना भारतीय र दुईजना जर्मनी नागरिकसहित २२ जना सवार रहेका थिए ।
