काठमाडौं । राष्ट्रिय जनमोर्चाले स्थानीय स्वशासनलाई मौलिक हकमा समावेश गर्न माग गरेको छ ।
अध्यक्ष चित्रबहादुर केसीले मंगलबार वक्तव्य प्रकाशित गरी स्थानीय तहमा जनताले आफ्ना जनप्रतिनिधिहरु चयन गर्न पाउने स्थानीय स्वशासनको अधिकारलाई महत्वका साथ उठाउँदै र त्यसका लागि संघर्ष गर्दै आएको स्मरण गर्नुभएको छ ।
‘संविधान सभाद्वारा संविधान निर्माणको क्रममा जनताको स्थानीय स्वशासनको अधिकारलाई संविधानको मौलिक हकभित्र समावेश गर्नुपर्दछ भनेर हामीले जोड दिएका थियौँ । स्थानीय तहको निर्वाचनबाट जनताले आफ्ना जनप्रतिनिधिहरु प्राप्त गरेका छन् । स्थानीय विकासको काम समेत अगाडि बढ्ने छ कुरामा हाम्रो विश्वास रहेको छ’ वक्तव्यमा भनिएको छ ।
राजमोले समयमा नै स्थानीय तहको निर्वाचन सम्पन्न भएकोमा प्रसन्नता व्यक्त गरेको छ । साथै स्थानीय तहमा चुनावको समीक्षा गर्ने पनि जनाएको छ।
यस्तो छ वक्तव्य :
‘२०७९ जेठ ९ गतेका दिन राष्ट्रिय जनमोर्चा केन्द्रीय सचिवालयको विस्तारित बैठक दलका अध्यक्ष का. चित्रबहादुर केसीको अध्यक्षतामा बस्यो । बैठकले गरेका निर्णयहरु सार्वजनिक गर्न यो वक्तव्य जारी गरिएको छ ।
१. बैठकमा २०७९ बैशाख ३० गते सम्पन्न भएको स्थानीय तहको निर्वाचनको समीक्षा गरियो । सर्वप्रथम बैठकले समयमा नै स्थानीय तहको निर्वाचन सम्पन्न भएकोमा प्रसन्नता व्यक्त गरेको छ । हाम्रो पार्टीले स्थानीय तहमा जनताले आफ्ना जनप्रतिनिधिहरु चयन गर्न पाउने स्थानीय स्वशासनको अधिकारलाई महत्वका साथ उठाउँदै र त्यसका लागि संघर्ष गर्दै आएको सबैमा विदितै छ । संविधान सभाद्वारा संविधान निर्माणको क्रममा जनताको स्थानीय स्वशासनको अधिकारलाई संविधानको मौलिक हकभित्र समावेश गर्नुपर्दछ भनेर हामीले जोड दिएका थियौँ । स्थानीय तहको निर्वाचनबाट जनताले आफ्ना जनप्रतिनिधिहरु प्राप्त गरेका छन् । स्थानीय विकासको काम समेत अगाडि बढ्ने छ कुरामा हाम्रोे विश्वास रहेको छ ।
२. स्थानीय तहको निर्वाचनमा प्रतिगमनलाई परास्त गर्नका लागि हाम्रो दलले नेका, माओवादी सहितका पाँच दलसँग गठबन्धन गरेको थियो । विगतम केपी ओली नेतृत्वको प्रतिगमनलाई पाँच दलीय गठबन्धनले पटक पटक परास्त गर्दै आएको थियो । अहिलेको स्थानीय तहको निर्वाचनमा पनि ओली नेतृत्वको प्रतिगमनलाई परास्त गर्न पाँच दलीय गठबन्धन सफल भएको छ । त्यसैले प्रतिगमनका विरुद्ध हाम्रो पार्टी सहितले गरेको पाँच दलीय गठबन्धन मूलतः सही थियो भन्ने कुरा राष्ट्रिय राजनीतिमा पुनः पुष्टि भएको छ । स्थानीय तहको निर्वाचनमा पाँच दलीय गठबन्धनको परिणाम नै प्रतिगमनलाई परास्त गर्न सफलता प्राप्त भएको छ । त्यसैले पाँच दलीय गठबन्धनलाई प्रदेश तथा केन्द्रीय निर्वाचनसम्म सँगै लैजानु पर्ने कुरामा बैठकले जोड दिएको छ ।
३. स्थानीय तहको निर्वाचनमा प्रतिगमनलाई परास्त गर्न पाँच दलीय गठबन्धनले प्राप्त गरेको सफलताको प्रशंसा गर्दै बैठकले पाँच दलमा आबद्ध कतिपय पक्षले एमालेसँग सहकार्य गरेको, गठबन्धनको निर्णयका विरुद्ध गएर गठबन्धनका उमेदवारलाई पराजित गर्न अन्य पक्षसँग साँठगाँठ गरेको, बागी उमेदवारी दिएको र गठबन्धनको मूल्य मान्यता विपरीत कैयाँै ठाउँमा दम्भ प्रदर्शन गरी सहकार्यमा वा चुनावमा संयुक्तरुपमा मिलेर जाने कुरामा बाधा पु¥याउने काम भएको जसको परिणाम एमालेलाई केही आंशिक लाभ पुगेको कुरातर्फ पनि बैठकको ध्यान गएको छ । गठबन्धनलाई स्वस्थ तथा मैत्रीपूर्णरुपमा अगाडि बढाउनका लागि गठबन्धनले गर्ने निर्णय र त्यसको सीमाभित्र रहेर नै हामी सबैले काम गर्नु पर्दछ । त्यसो गर्न सकेमात्र गठबन्धनलाई अगाडि बढाउन तथा प्रतिगमनलाई निर्णायक रुपमा परास्त गर्न मद्दत पुग्ने छ । त्यसतर्फ सरोकारवाला सबैको ध्यान जानुपर्ने कुरामा बैठकले जोड दिएको छ ।
४. गत स्थानीय तहको निर्वाचनभन्दा पाँच दलीय गठबन्धनका कारण यो निर्वाचनमा हाम्रो दललाई तुलनात्मक रुपमा केही बढी सफलता प्राप्त भएको छ । गतसालको निर्वाचनमा हामीले गाउँपालिका स्तरको नेतृत्वमा मात्र विजय प्राप्त गरे पनि नगरपालिकामा हामीले जीत हासिल गर्न सकेका थिएनौँ । तर यो निर्वाचनमा हामीले गाउँपालिकाका साथै केही नगरपालिकाका नेतृत्व तथा सह–नेतृत्वमा समेत विजय हासिल गर्न सफल भएका छौँ । तर विगतदेखि हामीले जित्दै आएका केही पालिका गुमाउनु परेको छ । ती पालिकामा के कति कारणले हामीले पराजय भोग्नु प¥यो त्यसको पनि हामीले गम्भीर समीक्षा गर्नुपर्ने आवश्यकता छ । त्यसो गरेर नै आगामी चुनावहरुमा हामीले त्यो स्थिति दोहोरिनबाट रोक्न सक्ने छौँ ।
५. हालै सरकारले पेट्रोलियम पदार्थमा गरेको मूल्यबृद्धिले जनतालाई निकै नै आहात पुराएको छ । सरकारले गरेको मूल्यबृद्धिको कडा विरोध गर्दै उक्त मूल्यबृद्धि फिर्ता लिन तथा बढ्दो महंगीलाई नियन्त्रण गर्न सरकारलाई प्रभावकारी कदम चाल्न बैठकले जोड दिएको छ ।
६. स्थानीय तहमा पार्टी संगठनको कामलाई अगाडि बढाउन निर्वाचन सम्बन्धी समीक्षा बैठक बस्ने र ती बैठकहरुमा केन्द्रबाट नै प्रतिनिधि खटाउने निर्णय भएको छ । ती समीक्षा बैठकका कार्यक्रमहरुलाई सफल पार्न सम्बन्धित सम्पूर्ण पार्टी समितिहरुलाई हार्दिक अनुरोध गर्दछौँ ।’
धन्यवाद !
मितिः २०७९ जेठ १० गते
चित्रबहादुर के.सी.
अध्यक्ष
