शंकर प्रसाद पोख्रेल, प्युठान ।
राष्ट्रिय जनमोर्चाका उपाध्यक्ष एवम् प्रवक्ता दुर्गा पौडेलले गठबन्धनका उम्मेदवारलाई जिताउन आम मतदातासँग अपील गर्नुभएको छ ।
प्युठानको झिमरुकमा शुक्रबार आयोजित संयुक्त चुनावी सभालाई सम्बोधन गर्दै पौडेलले प्रगिगमनलाई परास्त गर्नका लागि पाँचदलीय गठबन्धन बनेको भन्दै इमान्दारीपूर्वक मतदान गर्न गठबन्धन दलहरुसँग आग्रह गर्नुभयो ।
प्युठानबाट संसदमा प्रतिनिधित्वसमेत गर्ने सांसद पौडेलले केपी शर्मा ओलीले दुई दुई पटकसम्म संसद विघटन गरेर प्रतिगमनतर्फ मुलुकलाई लैजान खोजेको स्मरण गर्नुभयो । उहाँले देशमा प्रतिगमनको खतरा अझै कायमै रहेकाले निर्वाचनमा समेत गठबन्धन गर्नुपरेको स्पष्ट पार्नुभयो ।
सभालाई राष्ट्रिय जनमोर्चाका लुम्बिनी प्रदेस सांसद तारा जिसी र नेपाली कांग्रेसका नेता डा. गोबिन्दराज पोख्रेलले पनि सम्बोधन गर्नुभएको थियो ।
त्यसैगरी नेपाली कांग्रेस प्युठान क्षेत्रीय सभापति सरोज थापा (रोज राणा) सह महामन्त्री निमा गिरी, कांग्रेस पूर्व सभापति दिवाकर गौतम, राजमो नेता तिलक जिसि, झिमरुक गाउँपालिका राष्ट्रिय जनमोर्चाबाट गठबन्धनका अध्यक्ष उम्मेदवार टीका जिसि, नेपाली कांग्रेसबाट उपाध्यक्ष पदका उमेदवार प्रमोद पोख्रेल लगायतले सम्बोधन गर्नुभएको थियो ।
कार्यक्रमको अध्यक्षता कृष्ण बहादुर सुनार र सञ्चालन भिम जिसिले गर्नुभएको थियो भने स्वागत राजमो नेता ठाकुर गिरिले गर्नुभएको थियो ।
प्युठानको झिमरुकमा राष्ट्रिय जनमोर्चा र नेपाली कांग्रेसले गठबन्धन गरेर निर्वाचनमा सहभागी भएका छन् ।
