काठमाडौं । तेह्रथुम जिल्लाको छथर गाउँपालिकामा ६ दलीय गठबन्धन बनेको छ । गाउँपालिकामा पाँचदलीय गठबन्धनसँग संघीय लिम्बुवान परिषदले चुनावी तालमेल गरेपछि छ दलीय गठबन्धन बनेको हो ।
गाउँपालिकामा राष्ट्रिय जनमोर्चाका तर्फबाट वडा नं २ को दलित महिला सदस्यमा सरिता विकलाई उम्मेदवार बनाइएको राजमो तेह्रथुमले जनाएको छ ।
गाउँपालिकाको अध्यक्षमा माओवादी केन्द्र र उपाध्यक्षमा नेपाली कांग्रेसले उम्मेदवारी दिएको छ । यसअघि गाउँपालिकामा राजमोले सूर्य भट्टराईलाई अध्यक्षको उम्मेदवार बनाएको थियो । तर, ६ दलबीच भएको तालमेलपछि राजमोले अध्यक्षको उम्मेदवारीलाई निस्क्रिय बनाएको छ ।
गाउँपालिकामा ६ दलले संयुक्त चुनावी अभियान सुरु गरेका छन् ।
प्रदेश १ मा राजमोले केही स्थानमा तालमेल गरी उम्मेदवारी दिएको छ भने कतिपय स्थानमा एकल उम्मेदवारी दिएको छ ।
उदयपुरको त्रियुगा नगरपालिकामा पाँच दलीय गठबन्धन भित्रबाट कांग्रेस बाहेक चार दलको गठबन्धन बनेको राजमो नेता निलकुमार राईले जानकारी दिनुभएको छ ।
सो नगरपालिकाको वडा नम्बर १० मा राजमोको तर्फबाट मोहनबहादुर श्रेष्ठ वडाअध्यक्षको उम्मेदवार हुनुहुन्छ भने वडा नं. ११ मा दिपेन्द्र गौतम वडा सदस्यको उम्मेदवार बन्नु भएको छ ।
ओखलढुंगाको सिद्विचरण नगरपालिकामा राजमोले एकल उम्मेदवारी दिएको छ । नगरप्रमुखमा शेरबहादुर खत्री, उपप्रमुखमा शारदा खत्री, वडा नं. ३ को अध्यक्षमा कुन्तादेवी खत्री र सदस्यमा सञ्जमाया राईको उम्मेदवारी रहेको प्रमुख पदका उम्मेदवार शेरबहादुर खत्रीले जानकारी दिनुभयो ।
