प्युठान । प्युठानमा राष्ट्रिय जनमोर्चाले तालमेलबाट दुई स्थानीय तहको नेतृत्वमा उम्मेदवारी दिएको छ भने दुई स्थानीय तहमा उपप्रमुख पद पाएको छ ।
जिल्लाका विभिन्न पालिकामा गरी १७ वटा वडामा राजमोले तालमेलबाट वडाअध्यक्षमा उम्मेदवारी दिएको छ ।
राजमो केन्द्रीय सदस्य बोमबहादुर खत्रीका अनुसार जिल्लाको गौमुखी गाउँपालिकामा भने तालमेल भएको छैन । त्यहाँ राजमोले एकल उम्मेदवारी दिएको छ । यस्तै, नौबहिनी गाउँपालिकामा पनि राजमोले उपाध्यक्ष र वडाहरुमा उम्मेदवारी दिएको छ ।
नेपाली कांग्रेससँगको तालमेल अनुसार जिल्लाको झिमरुक र मल्लरानी गाउँपालिका राजमोले नेतृत्व पाएको छ भने ऐरावती गाउँपालिका र स्वर्गद्वारी नगरपालिकामा उपप्रमुख पद पाएको छ ।
झिमरुकमा राजमोका टिकाबहादुर जिसीले अध्यक्षको उम्मेदवारी दिनुभएको छ, जहाँ उपाध्यक्षमा नेपाली कांग्रेसका प्रमोद पोखरेल हुनुहुन्छ ।
यस्तै, मल्लरानीमा राजमो केन्द्रीय सदस्य एवम् जिल्ला अध्यक्ष कृष्ण बहादुर खड्का अध्यक्षको उम्मेदवार हुनुहुन्छ । त्यहाँ पनि उपाध्यक्ष कांग्रेसबाट छन् ।
यता, ऐरावती गाउँपालिकाको उपाध्यक्षमा कृष्णप्रसाद श्रेष्ठ र स्वर्गद्वारी नगरपालिकामा मिनराज राना उपप्रमुखको उम्मेदवार बन्नुभएको छ । ती दुवै स्थानमा कांग्रेसले प्रमुख पाएको छ ।
तालमेलबाट राजमोले झिमरुकमा ५, मल्लरानीमा ३, स्वर्गद्वारीमा ४, ऐरावतीमा २, प्युठान नगरपालिकामा २ र माण्डवीमा १ गरी १७ वडाअध्यक्ष पाएको छ । सरुमारानीमा भने २ जना वडासदस्य पाएको छ ।
जिल्लाका अन्य पालिकामा तालमेल भएपनि गौमुखीमा भने राजमोले एकल उम्मेदवारी दिएको छ । गौमुखीको अध्यक्षमा ज्ञामुराम न्यौपानेले उम्मेदवारी दिनुभएको हो । उपाध्यक्षमा तारा पुरीको उम्मेदवारी परेको छ ।
यता, नौबहिनी गाउँपालिकामा पनि राजमोले तालमेल बिना नै उपाध्यक्ष र वडाहरुमा उम्मेदवारी दिएको छ । नौबहिनीमा रामबहादुर केसी (पहाडी) उम्मेदवार बन्नुभएको छ ।
