बागलुङ । राष्ट्रिय जनमोर्चाका नेताहरुले जैमिनी नगरपालिकामा नेतृत्व नछाड्ने बताएका छन् । मंगलबार कुश्मिसेरामा आयोजित आमसभामा राजमो नेताहरुले राजमोले जैमिनीमा नेतृत्व छाड्नुपरे बागलुङमा गठबन्धनले सार्थकता नपाउने बताएका हुन् ।
जैमिनीलाई केन्द्रमा राखेर मात्र वार्ता सम्भव हुने उल्लेख गर्दै जैमिनी नगरपालिका जनमोर्चाले पाएको खण्डमा सहमति हुने र नपाएमा एक्लै चुनावमा जाने राजमो जिल्ला नेताहरुले बताए ।
गत निर्वाचनमा केही प्राविधिक समस्याका कारण चुनाव हार्नुपरेको भएपनि जैमिनीमा प्रमुख शक्ति राष्ट्रिय जनमोर्चा भएकाले जैमिनी छोडेर जानु परेको खण्डमा गठवन्धनले सार्थकता नपाउने उहाँहरुको भनाई थियो ।
सभालाई सम्बोधन गर्दै जातीय समता समाजका अध्यक्ष एवम् राष्ट्रिय सभाका सदस्य राजेश विकले गणतन्त्रको रक्षाका लागि पाँचदलीय गठवन्धन आवश्यक रहेको बताउनु भयो । नेता विकले केपी ओली नेतृत्वले पटक पटक प्रतिनिधी सभा
बिघटन गरेर गणतन्त्रलाई सिध्याउने प्रयास गरेकाले ५ दलीय गठबन्धन आवश्यक भएको बताउनु भयो ।
उहाँले अझैपनि प्रतिगमनका विरुद्ध संघर्ष गर्नुपर्ने आवश्यकता देखिएकाले आगामी निर्वाचनमा पनि ५ दलिय गठवन्धन आवश्यक रहेको उल्लेख गर्दै जनमतको आधारमा छिट्टै नै सहमतिले सार्थकता पाउने विश्वास व्यक्त गर्नुभयो ।
कार्यक्रममा राष्ट्रिय जनमोर्चाका पूर्वकेन्द्रीय सचिव कृष्ण अधिकारी, बागलुङ जिल्ला अध्यक्ष अमर थापा, सचिव भिमलाल पोखरेल र अखिल नेपाल जनजाती सम्मेलनमा पूर्व सल्लाहकार नरबहादुर पुनले मन्तव्य व्यक्त गर्नु भएको थियो ।
कार्यक्रम राष्ट्रिय जनमोर्चा जैमिनी नगरका अध्यक्ष डिलबहादुर श्रीसको अध्यक्षता, सदस्य चन्द्रबहादुर केसीको स्वागत र सचिव ठाकुरप्रसाद शर्मा आचार्यको सञ्चालनमा सम्पन्न भएको थियो । कार्यक्रममा रक्तिम सांस्कृतिक अभियानका कलाकारहरुले ‘गिलास’ मा भोट दिन आह्वान गर्दै विभिन्न सांस्कृतिक प्रस्तुती दिएका थिए ।
