धनगढी । कैलालीका पाँच राजनीतिक दलले चुनावी तालमेलका लागि तीन वटा ‘मापदण्ड’ बनाएका छन् । आइतबार सदरमुकाम धनगढीमा बसेको बैठकले तालमेलका लागि तीन वटा ‘मापदण्ड’ बनाएको हो ।
बैठकमा सहभागी एक नेताका अनुसार निर्वाचन क्षेत्र, गत स्थानीय तह निर्वाचनको मतभार र सांगठनिक संरचना हेरेर तालमेलको टुंगो लगाउने सहमति भएको हो । चैत ३० गते बस्ने बैठकले भागबण्डाको अन्तिम टुंगो लगाउने बैठकको निर्णय छ ।
कैलालीमा १३ वटा पालिका रहेका छन् । ती पालिकामा गठबन्धनका विभिन्न दलहरुले आ–आफ्नो ढंगले दाबी गरेपछि गठबन्धन बैठकले मापदण्ड तयार पारेको हो ।
आइतबारको बैठकमा जनता समाजवादी पार्टी (जसपा) पनि सहभागी भएको छ । शनिबार पत्रकार सम्मेलन गरेर गठबन्धनबाट बाहिरिएको घोषणा गरेको जसपाले आइतबार भने केन्द्रीय सदस्य होरिलाल चौधरीलाई छलफलमा पठाएको छ ।
बैठकमा एकीकृत समाजवादीका प्रदेश अध्यक्ष दीर्घ सोडारी, कैलाली जिल्ला अध्यक्ष भैरव रावल, माओवादी केन्द्रका प्रदेश अध्यक्षहरि ज्ञवाली ‘अखण्ड’, कैलारी गाउँपालिका अध्यक्ष लाजुराम चौधरी, कांग्रेसका तर्फबाट उपसभापति भीम बडुवाल, सचिव केशव मिश्र, राष्ट्रिय जनमोर्चाका जिल्ला अध्यक्ष जगतप्रसाद जोशी र जसपाबाट होरीलाल चौधरीको सहभागिता रहेको थियो ।
