दैलेख । गठबन्धनमा रहेका चार दलले दैलेखमा तालमेल गरेर जाने निर्णय गरेका छन् । नेपाली कांग्रेस, नेकपा माओवादी केन्द्र, नेकपा एकीकृत समाजवादी र राष्ट्रिय जनमोर्चाको बिहीबार बसेको बैठकले ११ वटै स्थानीय तहमा गठबन्धन गरेर जाने निर्णय गरेको हो ।
कांग्रेस सभापति मणिराम रेग्मी, माओवादीका संयोजक प्रेमबहादुर कटुवाल क्षेत्री, नेकपा एकीकृत समाजवादीका अध्यक्ष बरुनाथ योगी र राष्ट्रिय जनमोर्चाका कार्यवाहक अध्यक्ष लोगपाल थापा बैठकमा सहभागी हुनुहुन्थ्यो ।
बैठकपछि जारी संयुक्त अपिललमा निर्वाचनकेन्द्रित सम्पूर्ण कामलाई व्यवस्थित गर्न चारवटै दलका प्रमुखसहित ७ जना सम्मिलित संयन्त्र गठन गरिएको उल्लेख छ । स्थानीय तहमा पनि संयन्त्र बनाउने जनाइएको छ ।
गठबन्धनलाई व्यवस्थित गर्न एक(अर्काको मर्ममा चोट पुग्ने कुनै पनि गतिविधि सञ्चालन तथा अभिव्यक्त नगर्न पनि कार्यकर्ता पंक्तिमा निर्देशन दिइएको छ ।
