काठमाडौं । सत्तारुढ चार दलसहित पाँच दलले आसन्न स्थानीय तह निर्वाचनका लागि संयुक्त संयन्त्र गठन गर्ने भएका छन् ।
सत्तारुढ गठबन्धनका चार दल र सत्ता बाहिरको राष्ट्रिय जनमोर्चा सम्मिलित बैठकले स्थानीय निर्वाचनमा संयुक्त भएर जाने र त्यसका लागि जिल्ला तथा पालिका तहसम्म पाँचै दलको संयन्त्र बनाउने निर्णय गरेको राष्ट्रिय जनमोर्चाका उपाध्यक्ष दुर्गा पौडेलले जानकारी दिनुभयो ।
प्रधानमन्त्रीको सरकारी निवास बालुवाटारमा बिहीबार बसेको बैठकले स्थानीय तह निर्वाचनका लागि संयुक्त संयन्त्र बनाउने निर्णय गरेको हो।
‘पाँच दलबीच स्थानीय तहमा सहकार्य गर्ने सहमति बनेको छ । त्यसका लागि प्रदेश तथा पालिका र जिल्लास्तरसम्म संयन्त्र बन्नेछ’ पौडेलले भन्नुभयो, ‘बैठकले चैत २२ गते भित्रमा प्रदेश, जिल्ला र गाउँपालिकामा पाँच दलको अवस्थाबारे केन्द्रलाई विस्तृत प्रतिवेदन पेश गर्न समय दिने निर्णय गरेको छ । त्यसपछि उम्मेदवार छनोट थाल्ने सहमति जुटाएको छ।’
बैठकले पाँच दल बाहिरका दलहरूसँग चुनावी तालमेल गर्न नपाउने सर्तसहित निर्वाचनमा तालमेल गर्ने निर्णय गरेको हो ।
यस्तै, बैठकले प्रधानमन्त्री शेरबहादुर देउवाको भोलि (शुक्रबार) देखि हुने भारत भ्रमणलाई सफलताको कामना पनि गरेको छ । भ्रमणमा सीमा विवादको कूटनीतिक हल खोज्न, लिपुलेक, लिम्पियाधुरा र कालापानी लगायतका क्षेत्र अतिक्रमणबारे कुरा उठाउन प्रधानमन्त्रीसँग आग्रह गरेको पौडेलले बताउनुभयो ।
