प्यूठान । राष्ट्रिय जनमोर्चाका केन्द्रीय सल्लाहकार तथ अखिल नेपाल किसान महासंघका उपाध्यक्ष चन्द्रबहादुर केसीले एमालेले गुमेको सत्ता फर्काउन रुवाबासी गर्दै हिँडेको आरोप लगाउनुभएको छ ।
रास्ट्रिय जनमोर्चा, गाैमुखी ७ नारिकाेटको आयोजनामा भएको अगुवा कार्यकर्ता भेलालाई सम्बोधन गर्दै केसीले एमालेले साम्राज्यवादको इसारामा नेपालको गणतन्त्र, राष्टियता, धर्म निरपेक्षता, समावेशिता लगायत प्राप्त संघर्षका उपलब्धिहरू समाप्त गर्ने षड्यन्त्र गरेको बताउनुभयो । उहाँले फासिष्ट शासनको दिशामा एमाले गएको ठोकुवा समेत गर्नुभयो ।
उहाँले एमालेका केही नेताले प्युठानमा अनैतिक, अराजनैतिक र गालीगलौजको राजनीति संस्कार बस्ती बस्तीमा फैलाएको बताउनुभयो ।
‘दर्जनौं भष्टाचार, कुशासनबाट टाट पल्टिएको देशको अर्थ व्यवस्थालाई कसरी व्यवस्थित गर्नेबारे केही बताउनु नपर्ने, राष्ट्रघातको शिलशिला लगातार आजसम्म पनि कायम रहेको लगायत बिषयमा बोल्नु नपर्ने, देशको अस्तित्व समाप्त पार्ने साम्राज्यवादी षड्यन्त्र एमसीसी पास गर्न टुप्पी देखि पैतालासम्मको बल लगाउने ?’ उहाँले भन्नुभयो, ‘यस्ता राष्ट्रघातीहरूलाई यो निर्वाचनमा फड्के किनारमा पुराउनु पर्छ ।’
कार्यक्रममा राजमो लुम्बिनी प्रदेश सल्लाहकार वासुदेव पोख्रेल, केन्द्रीय सदस्य नारायण जिसी, नेकपा (मसाल) प्यूठान जिल्ला प्रवक्ता ज्ञामुराम न्यौपाने, राजमो गौमुखीका अध्यक्ष जनक केसी, युवक संघ केन्द्रीय सदस्य बरूणध्वज मल्ल, महिला संघ केन्द्रीय पार्षद तारा पुरी, वडा जनप्रतिनिधि ज्ञान बहादुर कुँवरले पनि प्रशिक्षण भेलामा विचार राख्नुभएको थियो ।
कार्यक्रममा महिला संघ जिल्ला सदस्य मधु जिसी, पूर्वगाविस अध्यक्ष लेख बहादुर जिसी, पूर्वजनप्रतिनिधि तथा जातीय समता समाज गौमुखी गाउँपालिका सदस्य बल बहादुर विक, राजमो वडा कमिटी सल्लाहकार लाल बहादुर पुरी, वडा समिति सदस्यहरू तितला पुरी, मोहन परियार, मूल प्रवाहका वेगम कुँवर, बयोवृद समाजसेवी नर बहादुर कुँवर, देउराली कृषि सहकारीका सञ्चालक बिदूर पुरीले पनि आतिथ्यता ग्रहण गर्नु भएको थियो ।
कार्यक्रमको सञ्चालन राजमो वडा सचिव वीर बहादुर केसी, स्वागत उपाध्यक्ष हुकुम बहादुर थापा र अध्यक्षता राजमो वडाध्यक्ष चन्द्रबहादुर केएमले गर्नुभएको थियो ।
