भैरहवा । राष्ट्रिय जनमोर्चाका अध्यक्ष चित्रबहादुर केसीले वर्तमान पुँजीवादी गणतन्त्रबाट जनताका आधारभूत समस्या समाधान हुन नसक्ने बताउनुभएको छ ।
शनिबार रुपन्देहीको सिद्धार्थनगरस्तरीय कार्यकर्ता भेलालाई सम्बोधन गर्दै अध्यक्ष केसीले अहिले प्राप्त गणतन्त्र, धर्मनिरपेक्षता, समावेशता जस्ता उपलब्धिलाई जोगाउँदै थप अधिकारका लागि अझ धेरै संघर्ष गर्नुपर्ने बताउनुभयो ।
‘अहिलेको गणतन्त्र पुँजीवादी गणतन्त्र हो । यसले जनताका अधारभूत समस्या समाधान गर्न सक्दैन’ केसीले भन्नुभयो, ‘तर, यो गणतन्त्र पनि त्यसै आएको होइन । जनताको बलिदानीबाट प्राप्त उपलब्धिलाई जोगाउँदै थप अधिकारका लागि संघर्ष अगाडि बढाउनुपर्ने आवश्यकता छ ।’
अध्यक्ष केसीले यो गणतन्त्रलाई समाप्त पार्न देशभित्रका प्रतिक्रियावादी शक्ति, राजावादी र भारतीय साम्राज्यवादी शक्ति लागि परेको बताउनुभयो । उहाँले गणतन्त्र विरुद्ध वामपन्थी संकीर्णवादी कोणबाट समेत आक्रमण भइरहेको बताउनुभयो ।
उहाँले एमाले अध्यक्ष केपी ओलीले दुई दुई पटक संसद विघटन गरेको स्मरण गर्दै अहिले पनि गणतन्त्रविरुद्ध एमाले, राजावादी र भारतीय साम्राज्यवादीबीच अघोषित गठजोड रहेको बताउनुभयो ।
अध्यक्ष केसीले देशमा राष्ट्रियता थप कमजोर बन्दै गइरहेको टिप्पणी पनि गर्नुभयो । उहाँले एमसीसी जस्तो राष्ट्रघाती प्रावधानलाई अर्थहीन व्याख्यात्मक घोषणा गरेर पारि गर्नु गलत भएको बताउनुभयो । सोही कारण सरकारलाई दिएको समर्थन आफ्नो पार्टीले फिर्ता लिएको उहाँले बताउनुभयो ।
अध्यक्ष केसीले पुँजीवादी चुनाव निकै खर्चिलो हुने भन्दै सत्ताधारीहरुले राष्ट्रको सम्पती दुरुपयोग गरेर चुनावमा खर्च गर्ने गरेको बताउनुभयो । उनीहरुका विरुद्ध क्रान्तिकारी चेतना, विचार र राजनीति लिएर उच्च मनोबलका साथ जनतामा जान कार्यकर्तालाई आग्रह गर्नुभयो ।
सो चुनावी भेलालाई कम्युनिष्ट संग्रहालयका अध्यक्ष चेतनाथ आचार्य र राजमो रुपन्देहीका अध्यक्ष बद्रे आलमले शुभकामना दिनुभएको थियो । कार्यक्रममा राजमो नेता दयारामले चुनावी कार्यक्रम प्रस्तुत गर्नुभएको थियो ।
भेलाले नेत्रप्रसाद आचार्यको संयोजकत्वमा पाँच सदस्यीय निर्वाचन परिचालन समिति र २५ सदस्यीय प्रचार प्रसार समिति गठन गरेको छ ।
राजमो सिद्धार्थनगर नगर समितिका अध्यक्ष नेत्र प्रसाद आचार्यको अध्यक्षता र बुद्धिजीवी संघका हिरालाल धामीको सञ्चालनमा अघि बढेको कार्यक्रममा महिला नेत्री दुर्गा शर्मा आचार्यले स्वागत गर्नुभएको थियो ।
देवदह नगरस्तरीय भेला
यसैगरी राष्ट्रिय जनमोर्चा देवदह नगरपालिकामा चैत १२ गते नै स्थानीय निर्वाचन सम्बन्धी कार्याकर्ता भेला सम्पन्न भएको छ । बागबिर पुनको अध्यक्षता र धनु पाण्डेको सञ्चालनमा सम्पन्न भेलामा जातीय समता समाजका केन्द्रीय अध्यक्ष तथा राष्ट्रिय सभा सदस्य तुल प्रसाद विस्वर्कमाको प्रमुख आतिथ्यतामा रहेको थियो ।
भेलामा राजमो जिल्ला सचिव टानबहादुर केसी, राजमो बुटवल कार्यालयका भिमलाल न्यौपाने, जनजाति सम्मेलनक जिल्ला अध्यक्ष नारायण पुन र देवदह नगर समितिका अध्यक्ष हरि केसीले देशको समसामयिक विषयमा आफ्ना भनाई राख्नु भएको थियो ।
कार्यक्रममा वैसाख ३० गतेको स्थानीय निर्वाचनलाई सफल पार्न ७ सदस्यीय निर्वाचन परिचालन समिति, ९ सदस्यीय आर्थिक व्यवस्थापन समिति र ५१ सदस्यीय प्रचार प्रसार समिति गठन गरिएको छ ।
