दिपेन्द्र परियार, गुल्मी ।
गुल्मीको कालीगण्डकी गाउँपालिकामा विभिन्न पार्टी पत्यिाग गरी ४८ जना राष्ट्रिय जनमोर्चामा प्रवेश गरेका छन् । यसरी प्रवेश गर्नेहरुमध्ये नौमती बाजा समूह समेत रहेको छ ।
शनिबार कालीगण्डकी गाउँपालिका–६ मा भएको राजमोको चुनावी भेलामा उहाँहरु पार्टी प्रवेश गर्नुभएको हो । राष्ट्रिय जनमोर्चाको स्पष्ट नीति, कार्यक्रम, देश र जनता प्रतिको बफादारी बुझेर तथा अन्य पार्टीहरुले देश र जनताप्रति गरेको गद्धारीबाट वाक्क भएर आफूहरु राष्ट्रिय जनमोर्चामा प्रवेश गरेको उहाँहरुले बताउनुभएको छ ।
कार्यक्रममा बोल्दै राजमो केन्द्रीय सदस्य रामकुमार क्षेत्रीले मुलुकलाई खोक्रो बनाउँदै गएको संघीयता र एमसीसी जस्ता राष्ट्रघाती प्रावधान राजमोले मात्रै खारेज गर्न सक्ने बताउनु भयो ।
उहाँले नेपाली कांग्रेस, एमाले, माओवादी लगाएतका आफूलाई ठूला राजनीतिक दल बताउनेहरुले जनताको चाहना बिपरित मुलुकलाई संघीयताको दलदलमा धकेलेर देशलाई चरम आर्थिक संकटमा फसाउँदै लगेकोे बताउनु भयो ।
क्षेत्रीले परिवर्तनशील समयसँगै नेपाली जनताको बुझाई र दृष्टिकोणमा पनि परिवर्तन आउने क्रम जारी रहेको भन्दै राष्ट्रप्रेमी जनताहरु जनमोर्चामा गोलबन्द भैरहेको र त्यसको सुरुवात गुल्मीको कालिगण्डकी गाँउपालिकाबाट भएको बताउनुभयो ।
भेलाले चित्र बहादुर थापाको संयोजकत्वमा ४१ सदस्यीय मूल चुनाव प्रचारप्रसार समिति गठन गरेको छ ।
त्यस्तै राष्ट्रिय जनमोर्चा कालिगण्डकी गाँउपालिका सदस्य रन बहादुर थापाको संयोजकत्वमा ५३ सदस्यीय प्रचार प्रसार समिति गठन गरिएको छ भने पूर्णबहादुर थापाको संयोजकत्वमा ७ सदस्यीय आर्थिक समिति तथा सुवास थापाको संयोजकत्वमा २१ सदस्यीय स्वमसेवक समिति गठन गरिएको चित्र बहादुर थापाले जानकारी दिनुभयो ।
कार्यक्रम राजमो खड्गकोट समितिका अध्यक्ष चित्र बहादुर थापाको अध्यक्षता, वडा सदस्य पूर्ण बहादुर थापाको स्वागत,राजमो कालिगण्डकी गापा सदस्य रन बहादुर थापाको सन्चालनमा सम्पन्न भएको थियो ।
