धनगढी । राष्ट्रिय जनमोर्चा, कैलालीको निर्वाचन केन्द्रित भेला सम्पन्न भएको छ । बिहीबार गोदावरी नगरपालिका वडा नं १२ रेगुलेटरमा भेला भएको हो ।

जिल्ला भेलालाई सम्बोधन गर्दै राष्ट्रिय जनमोर्चाका महासचिव मनोज भट्टले स्थानीय तहमा जित्ने गरी निर्वाचनमा होमिन कार्यकर्तालाई निर्देशन दिनुभयो । उहाँले स्थानीय सत्तामार्फत जनताका धेरै काम गर्न सक्ने भएकोले जनतालाई सचेत पार्ने गरी पार्टीका नीतिलाई जनतामाझ लैजानु पर्ने धारणा राख्नुभयो ।

उहाँले कतिपय राजनीतिक दलका कार्यकर्ता तथा जनप्रतिनिधि भ्रष्टाचारमा लिप्त भइरहेकोतर्फ जनतालाई सचेत बनाउनुपर्ने बताउनुभयो । फरक प्रशंगमा उहाँले देशको राष्ट्रियता खतरामा परेको, एमसीसीका कारण वाह्य शक्तिको चलखेल बढ्दै गएको, संघीयताका कारण विकास निर्माणको रकम साधारण खर्चतर्फ अत्यधिक खर्च भइरहेको र देशमा प्रतिगमनको खतरा कायमै रहेकोबारे जनतामा स्पष्ट पर्नुपर्ने बताउनुभयो ।

कार्यक्रमलाई सम्बोध गर्दै वरिष्ठ वामन्थी नेता आरसी भट्टले चुनावमा सत्ताधारी दलहरुले पैसाको खोलो बगाउने उल्लेख गर्दै राष्ट्रिय जनमोर्चाका कार्यकर्तालाई विचार र राजनीतिको हतियार लिएर जनतामाझ जान आग्रह गर्नुभयो ।

सो भेलालाई राष्ट्रि जनमोर्चाका केन्द्रीय सदस्य एवम् सुदूरपश्चिम प्रदेश अध्यक्ष नन्दराज भट्ट, प्रदेश कोषाध्यक्ष शेरबहादुर विक, महिला संघका जिल्ला उपाध्यक्ष अन्जना मास्के, युवक संघका पूर्व केन्द्रीय सदस्य शिवराज रेग्मीलगायत नेताहरुले सम्बोधन गर्नुभएको थियो ।

राजमो जिल्ला अध्यक्ष दयाराम सञ्ज्यालको अधयक्षा, सचिव जगत जोशीको सञ्चालन र उपाध्यक्ष जय विकको स्वागतबाट अघि बढेको सो कार्यक्रममा अखिल नेपाल किसान महासंघका केन्द्रीय सदस्य हरिकृष्ण पाण्डे, जनजाती सम्मेलनका केन्द्रीय कोषाध्यक्ष खडक राना, नेकपा (मसाल) का जिल्ला प्रवक्ता मिलन शाही, बुद्धिजिवी संगठनका जयदेव पाण्डे, अखिल (छैठौं) का जिल्ला सदस्य अजय विकलगायतको आतिथ्यता रहेको थियो ।