जनकपुरधाम । नेकपा (माओवादी केन्द्र) का नेता मातृका यादवले अध्यक्ष पुष्पकमल दाहाल प्रचण्ड उपस्थित कार्यक्रम बहिष्कार गर्नुभएको छ ।
माओवादी केन्द्रले मंगलबार जनकपुरमा आयोजना गरेको मधेश प्रदेश स्तरीय प्रशिक्षण कार्यक्रममा नेता मातृका यादव उपस्थित हुनुभएन । जनकपुरमै रहेका यादव प्रचण्डको कार्यक्रम बहिष्कार गर्नुभएको हो ।
दिउँसो करिब १२ बजे प्रचण्ड जनकपुर एयरपोर्टमा उत्रिँदा यादव पनि विमानस्थलमा पुग्नुभएको थियो । तर, माओवादीका नेता कार्यकर्ताले माला लगाउँदै प्रचण्डलाई स्वागत गरिरहँदा यादव भने परै बसेर त्यो दृश्य हेरिरहनुभएको थियो । उहाँमा कुनै उत्साह देखिँदैनथ्यो ।
त्यहाँबाट प्रचण्ड जनकपुरकै वेलकम होटलमा जानुभयो । जहाँ माओवादीका केन्द्रीय स्तरका धेरै नेता भेला भएका थिए । तर, मातृका यादव त्यहाँ पनि जानुभएन ।
मधेशका प्रभावशाली नेता मातृका यादव माओवादीको प्रदेशस्तरीय कार्यक्रममा उपस्थित नभएपछि यतिबेला विभिन्न टिकाटिप्पणी भइरहेको छ। सो विषयमा अध्यक्ष पुष्पकमल दाहाल प्रचण्डले भने असन्तुष्टि व्यक्त गर्नुभयो ।
प्रशिक्षण कार्यक्रमको अन्तिममा प्रचण्डले मातृका यादव कार्यक्रममा उपस्थित नभएकोप्रति असन्तुष्टि जनाउनुभएको छ ।
‘मैले उहाँलाई पटकपटक तपाईं कार्यक्रममा आउनुपर्छ भनेँ, तर उहाँ आउनु भएन,’ प्रचण्डको भनाई थियो, ‘यत्रो ठूलो कार्यक्रम मधेशमा हुने, मातृका यादव उपस्थित नहुने। यो तरिका विल्कुल बेठिक हो। यसले पार्टीलाई भलो हुँदैन, तपाईंलाई पनि भलो हुँदैन।’
माओवादीले संसदबाट एमसीसी पारित गरेपछि माओवादी कार्यकर्ता रुष्ट बनेका छन् । त्यसक्रममा कैयौं नेता कार्यकर्ताले सो पार्टीसमेत परित्याग गरेका छन् । हालै माओवादी केन्द्र महोत्तरीका संयोजक तुलसीप्रसाद ढुंगानासहित चारजना नेताले पार्टी परित्याग गरेका थिए ।
