काठमाडौँ । मोरङको लेटाङ–५ खेरुवास्थित शिक्षा विकास माविमा आइतबार झडप हुँदा एक महिला प्रहरीको मृत्यु भएको छ ।
आफ्नै छात्रालाई बलात्कार प्रयास गरेको आरोप लागेका शिक्षक मनोज पौडेल आक्रोशित विद्यार्थीबाट घेरिएपछि उद्धारका लागि पुगेको प्रहरी टोलीमाथि आक्रमण हुँदा प्रहरी जवान उर्मिला श्रेष्ठको मृत्यु भएको हो ।
झडपमा प्रहरीकै मृत्यु भएपछि त्यस क्षेत्रमा अनिश्चितकालीन कर्फ्यु लगाइएको छ। सोमबार बिहान ७ बजेदेखि अर्को आदेश नहुन्जेलसम्मका लागि घटनास्थलसहित लेटाङका वडा नम्बर ४, ५ र ६ कर्फ्यु लगाइएको मोरङका सहायक प्रमुख जिल्ला अधिकारी शरदकुमार पोखरेलले नेपालखबरलाई जानकारी दिनुभयो ।
कक्षा ७ मा पढ्ने १३ वर्षीया एक किशोरीले आफूलाई शिक्षकले यौन दुर्व्यहार गरेको भन्दै अभिभावक लिएर आइतबार विद्यालय पुगेकी थिइन् । यो थाहा पाउनासाथ विद्यार्थीहरू आरोपित शिक्षक मनोज पौडेलविरुद्ध आक्रोशित भए। आक्रोशित विद्यार्थीले शिक्षक पौडेलको को २७ प १९२१ नम्बरको मोटरसाइकल जलाइदिए ।
शिक्षक पौडेलको ज्यान नै जोखिममा पर्न थालेपछि विद्यालय प्रशासनले प्रहरी गुहार्यो । प्रहरीको सुरक्षा घेरामा उनलाई दिनभर विद्यालयभित्रै थुनेर राखियो ।
बाहिर विरोध बढ्दै गयो। प्रहरीले शिक्षक पौडेललाई सुरक्षा दिँदै बाहिर निकाले र त्यहाँबाट उद्धारका लागि मे १ च ६६२ नम्बरको एम्बुलेन्समा राख्यो । तर बढ्दै गएको भीडले आरोपित शिक्षक पौडेलविरुद्ध नाराबाजी गर्दै एम्बुलेन्समै ढुंगामुढा गर्न थाले।
अवस्था नियन्त्रणमा लिन प्रहरीले अश्रुग्यास प्रहार गर्न थाल्यो। यसै क्रममा प्रहरी र आक्रोशित विद्यार्थीबीच झडप भयो। मोरङ प्रहरीका अनुसार भीडको आक्रमणबाट एसपी जनार्दन जीसीसहित १५ जनाभन्दा बढी प्रहरी घाइते भएका छन्।
तीमध्ये प्रहरी जवान उर्मिला श्रेष्ठ गम्भीर घाइते भइन्। उपचारका लागि हताहतार उनलाई लेटाङ बजारस्थित मनकामना अस्पताल पुर्याइयो, तर चिकित्सकले उनको मृत्यु भइसकेको बताए ।
आरोपित शिक्षकलाई प्रहरीले नियन्त्रणमा लिएको छ । झडपमा संलग्न रहेको आरोपमा प्रहरीले ६ जनालाई नियन्त्रणमा लिएको छ।
