जगत प्रसाद रेग्मी, काठमाडौं ।
अखिल नेपाल जनजाती सम्मेलनका अध्यक्ष निमबहादुर मगरले नेपाललाई अमेरिकी साम्राज्यवादको गुलाम बनाउने प्रयास भएको बताउनु भएको छ ।
विभिन्न दलसम्बद्ध जनजाती संगठनहरुले आइतबार देशब्यापी गरेको विरोध प्रदर्शन अन्तर्गत काठमाडौंमा आयोजित विरोध सभालाई सम्बोधन गर्दै अध्यक्ष बुढाथोकीले एमसीसी नेपाली जनताको हितमा नभएकाले खारेज हुनुपर्नेमा जोड दिनुभयो ।
‘संसदबाट जबर्जस्ती एमसीसी पास गर्नासाथ युक्रेनको पक्षमा उभिएर देशलाई अमेरिकी साम्राज्यवादको गुलाम बनाउन खोजिएको छ’ बुढाथोकीले भन्नुभयो, ‘एमसीसी नेपालको स्वतन्त्र परराष्ट्र नीति र नेपाली जनताको पक्षमा छैन भन्ने कुरा स्पष्ट भइसकेको छ । त्यसैले यो खारेज हुनुपर्छ ।’
उहाँले संसारभरिका एमसीसी इन्डोपेसिफिक सैन्य रणनीति अन्तरगतको कार्यक्रम भएको र यसले नेपाललाई ध्रुवीकरण गरेको बताउनुभयो ।
अध्यक्ष बुढाथोकीले अमेरिकी साम्राज्यवाद र त्यसका दलालहरुका विरुद्ध लड्नुपर्नेमा पनि जोड दिनुभयो । नेपाललाई अफगानिस्तान र इराक लगायतका देश जस्तै खरानी बनाउन सक्ने उहाँको चेतावनी थियो । नेपाललाई केन्द्र बनाएर चीन घेर्ने रणनीति अमेरिकाको हो भन्नू भयो ।
कार्यक्रममा नेकपा (क्रान्तिकारी माओवादी) का पीवीएम रामसिंह श्रीसले विदेशीको दलाली गर्ने कांग्रेससँग महाकालीमा एमाले र एमसीसीमा प्रचण्ड नेतृत्वको माओवादी थपिएको बताउनुभयो ।
विरोध सभामा नेपाल कम्युनिस्ट पार्टी सम्बद्ध जातीय विभागका तर्फबाट जिवेन्द्र शाही, उत्पीडित राष्ट्र मोर्चा नेपालका गोकुल राई, अखिल नेपाल राष्ट्रिय आदिवासी जनजाती महासंघका महासचिव भोगिस राल्फाली, बृटिस गोर्खा भूतपूर्व सैनिक संघका पदम सुन्दर लावती, जातीय क्षेत्रीय राष्ट्रिय मुक्ति मोर्चाको तर्फबाट सुदर्शन निम्गेलले सम्बोधन गर्नुभएको थियो ।
रक्तिम सांस्कृतिक अभियानका सचिव हेमराज आश्रमले एमसीसी विरुद्ध गीत गाउनु भएको थियो भने सामना परिवारका कलाकारले गीत तथा नृत्य प्रस्तुत गरेका थिए ।
कार्यक्रम अध्यक्षता ओम गुरुङले गर्नु भएको थियो भने सन्चालन सुदर्शन मंगोलले गर्नु भएको थियो ।
