कपिलवस्तु । कपिलवस्तु जिल्लाको पश्चिम विजयनगर गाउँपालिकामा राष्ट्रिय जनमोर्चाको कार्यालय उद्घाटन गरिएको छ ।
विजय नगर वडा न ६ जुरपानीमा स्थापित कार्यालयको राष्ट्रिय जनमोर्चा जिल्ला सल्लाहकार तथा अखिल नेपाल ट्रेड युनियन महासंघ (अन्टुक) का केन्द्रीय सदस्य केरसिंह अदैले उद्घाटन गर्नुभयो ।
तयसक्रममा अदैले सम्बोधन गर्दै राष्ट्रिय जनमोर्चालाई गाउँ–गाउँ, टोल–टोलमा केन्द्रित गरी पार्टीका एजेण्डा जनतामाझ स्थापित गर्न आग्रह गर्नुभयो ।
हाल स्थापित भएको सम्पर्क कार्यालयबाट स्थानीय निर्वाचनमा सहयोग हुने, संगठन व्यवस्थित पार्न मद्दत पुग्ने भन्दै उहाँले कार्यालयलाई व्यवस्थित गर्न सबैको सहयोग आवश्यक रहेको बताउनुभयो ।
कार्यक्रममा जातीय समता समाजका केन्द्रीय सल्लाहकार दिल बहादुर विकले देशको तत्कालीन राजनीतिक परिस्थिति र स्थानीय निर्वाचन सम्बन्धी धारणा राख्नुभएको थियो ।
उद्घाटन कार्यक्रममा राष्ट्रिय जनमोर्चा विजय नगर ५ का अध्यक्ष खदेरु पासी, वडा नं ७ का अध्यक्ष राम समारे धोबी, वडा नं ६ का पतेश्वरी यादव, राजमो नगर सदस्य मनिषा कोरी, समाजसेवी मन्त्राज यादव, टेक बहादुर केसी, शिवरात्रि पठानले मन्तव्य राख्नु भएको थियो ।
उद्घाटन कार्यक्रमको सञ्चालन राष्ट्रिय जनमोर्चा विजयनगरका सचिव गोविन्द परिवार र अध्यक्षता अध्यक्ष गोपाल सुनारले गर्नु भएको थियो ।
राष्ट्रिय जनमोर्चा विजयनगरले गाउँपालिका अध्यक्ष, उपाध्यक्ष सहित ७ वटै वडामा उम्मेदारी दिने तयारी गरेको छ । विजयनगरमा पछिल्लो समय विभिन्न पार्टी परित्याग गरी दर्जनौं व्यक्तिहरु राष्ट्रिय जनमोर्चामा प्रवेश गर्नुभएको छ ।
