बागलुङ । राष्ट्रिय जनमोर्चाका महासचिव मनोज भट्टले एमसीसी पास गरेर अमेरिकी साम्राज्यवादसामु कायरता देखाएको आरोप लगाउनुभएको छ ।
एमसीसी खारेजीको माग गर्दै शनिबार बागलुङ बजारमा आयोजित विरोध सभालाई सम्बोधन गर्दै महासचिव भट्टले ५५ अर्ब अनुदानको नाममा देशको राष्ट्रियतालाई बन्धक बनाउन खोजिएको बताउनुभयो । उहाँले सत्तासिन पार्टीहरुले कार्यकर्तालाई सडकमा विरोध गर्न पठाएर आफूले संदनमा एमसीसी पारित गरेको बताउनु भयो ।
नेता भट्टले एमसीसी परियोजना विकास योजनाको उदेश्यले आए जस्तो देखिए पनि यो देशको सुरक्षा सैन्य रणनीतिसँग जोडिएको बताउनुभयो । यसले देशको सार्वभौम सत्तालाई खतरामा पार्ने उहाँको भनाई थियो । उहाँले अमेरिकी साम्राज्यवादी सामु सत्ताधारीहरुले कायरता प्रर्दशन गरे नि राष्ट्रिय जनमोर्चा राष्ट्रियता बचाउनका लागि सधैँ देश र जनताको पक्षमा रहेको बताउनु भयो ।
बिगतमा कोसी, गण्डकी, महाकाली जस्ता राष्ट्रघाती सन्धि सम्झौता गरेका तिनै दलहरुले देशको स्वार्थ भन्दा आफ्नो व्यक्तिगत स्वार्थका लागि वैदेशिक शक्तिकेन्द्र सामु घुँडा टेकेको भट्टले बताउनुभयो । उहाँले एमसीसी संसदबाट पारित भएपनि जनताले सडकबाटै खारेज गर्ने चेतावनी दिँदै सम्पूर्ण राष्ट्रवादी जनतालाई यसको विरोधमा उत्रिन आह्वान पनि गर्नुभयो ।
राष्ट्रिय जनमोर्चा बागलुङका सचिव भीमलाल पोखरेलको सञ्चालन गर्नु भएको कार्यक्रममा राजमो केन्द्रीय सदस्य तथा जिल्ला समन्वय समिति बागलुङका प्रमुख राजेन्द्र ढुङगानाले मन्तब्य राख्नु भएको थियो ।
बागलुङ बजारमा नारा जुलुस हुँदै लोकतान्त्रिक चोकमा पुगेर बिरोध सभामा परिणत भएको थियो ।
