काठमाडौं । राष्ट्रिय जनमोर्चाका अध्यक्ष चित्रबहादुर केसीले अमेरिकालाई खुशी पार्न नेपालका शासकहरुले षडयन्त्रमुलक ढंगले एमसीसी संसदबाट पास गरेको बताउनुभएको छ ।

आठ राजनीतिक दलले शुक्रबार काठमाडौंमा आयोजना गरेको विरोध सभालाई सम्बोधन गर्दै अध्यक्ष केसीले संसदका मुख्य दलहरुले अमेरिकी साम्राज्यवादको दलाली गरेर चुनाव जित्न र सत्तामा टिक्न एमसीसी स्वीकार गरिएको बताउनुभयो ।

‘७० वर्षको अवधिमा भारत, चीन, अमेरिका, जापानलगायत देशबाट खर्बौं रुपैयाँ अनुदान आएको छ । तर, कहिल्यै यहाँका राजनीतिक दलले, जनताले विरोध गरेको सुन्नुभएको छ?’ उहाँले भन्नुभयो, ‘तर अहिले किन जिल्ला जिल्लामा एमसीसीको विरोध भएको छ? किन प्रवासका देशभक्त नेपालीले यसको विरोध गरेका छन् भन्दा यो देशको राष्ट्रियता, सार्वभौमिकता र अखण्डतासँग सौदाबाजी गरेर ल्याइएको छ ।’

केसीले अमेरिकाले दिने भनेको करिब ६० अर्ब रुपैयाँ लगानी हो कि अनुदान हो? भनी प्रश्न पनि गर्नुभयो । ‘अमेरिकी अधिकारीहरुले भनेका छन्, यो लगानी हो। तर, अमेरिकाको पक्षपातीहरुले अमेरिकाको दलाली गर्नेहरुले यो दान हो भनिरहेका छन्’ उहाँले भन्नुभयो ।

केसीले आजभन्दा तीन वर्ष पहिला अहिलेको प्रतिपक्षी एमालेले संसदबाट एमसीसी पास गर्न प्रयास गरेको स्मरण पनि गर्नुभयो । उहाँले एमसीसी पास गरेर अमेरिकाको दलाली गर्न दलहरुबीच प्रतिष्पर्धा भएको आरोप पनि लगाउनुभयो ।
‘अहिलेसम्म विदेशबाट दिएको दान संसदबाट पारित गरेको उदाहरण देख्नुभएको छ?’ केसीले प्रश्न गर्नुभयो, ‘नेपालमा लगानी गरेर आफ्नो बापबैरी साँध्न अमेरिकाले लगानी गरेको छ। नेपाल मात्रै होइन, कैयौं देशमा अमेरिकाले यस्तो लगानी गरेको छ र कतिपय देशले फिर्ता गरिदिएका छन् ।’

अध्यक्ष केसीले माओवादी केन्द्र र एकीकृत समाजवादीले २÷४ महिना बिना संशोधन एमसीसी पास गर्न सकिँदैन भनेर हल्ला गरेको र अन्तिममा जस्ताको तस्तै पास गरेको आरोप पनि लगाउनुभयो । उहाँले १२ बुँदे व्याख्यात्मक टिप्पणीको कुनै अर्थ नरहेको बताउनुभयो ।

एमसीसी संसदबाट पास भएपनि सडकबाट खारेज गरेरै छोड्ने केसीको चेतावनी छ । अध्यक्ष केसीले एमसीसी कार्यान्वयनमा आएमा नेपालको हालत युद्धरत मुलुकहरु इराक, सिरिया, अफगानिस्तानको जस्तो हुने चेतावनी दिनु भयो । उहाँले एमसीसी राष्ट्रधाती सम्झौंता भएको उल्लेख गर्दै त्यसको प्रतिवादमा उत्रन पनि सबैलाई अपिल गर्नु भयो ।

केसीले अमेरिकीको समर्थनमा निर्वाचन जित्नका लागि ठूला राजनीतिक दलहरुले प्रतिस्पर्धा गरेर एमसीसीजस्तो राष्ट्रघाती सम्झौंता पारित गराएको आरोप लगाउनु भयो ।

उहाँले भन्नु भयो, ‘अमेरिकी आर्शिवाद लिएर चुनाव जित्नका लागि ठूला दलहरुले एमसीसी संसदबाट पारित गराउन प्रतिस्पर्धा गरे । देशको हितमा होइन । नेपाली जनताको हितमा होइन । राष्ट्रियताको संरक्षण गर्न होइन । त्यसको सौदाबाजी गरेर आज मुलुक अप्ठयारो स्थितिमा गएको छ । म उपस्थिति सबै दाजुभाई दिदीबहिनीहरुलाई के भन्नु भने–एमसीसी लागू भयो भने नेपालीहरु विदेश जानुपर्दैनसम्म भनेका छन, तिनका दलालहरुले । एमसीसी नेपालमा पास भयो भने हाम्रा छोराछोरीहरु कोही पनि विदेश जानु पर्दैन रे । काम मिल्छ रे । अहिलेसम्म दशौं खर्व विदेश पैसा आएको छ ।

त्यसको ब्याज खर्च गरेर साँवा उनीहरुले खाई राखेका छन । ब्याज जनताको नाममा खर्च गरेका होलान । त्यसकारणले यस खालको झुट कुरा गरिराखेका छन र जुनसुकै मूल्यमा पनि एमसीसी पारित गरेनौ भने हाम्रो स्थिति अफगानिस्तानको हुनेछ । हाम्रो स्थिति इराकको हुनेछ । हाम्रो स्थिति सिरियाको हुनेछ । यो मैले भावावेशमा आएर भनेको छैन । आज नेपाली जनताले देशका विभिन्न ठाउँमा एमसीसीको विरोध गरिराखेका छन ।’