जीवन शाही, सुर्खेत ।
सोमबार साँझदेखि वीरेन्द्रनगरमा जारी गरिएको निषेधाज्ञा थप कडाइ गरिएको छ । निषेधाज्ञाको क्रममा आदेश उल्लंघन गर्नेलाई गोलीसमेत हान्नसक्ने जिल्ला सुरक्षा समितिको बैठकले आदेश दिएको छ । जिल्ला सुरक्षा समितिको बैठकले आदेश उल्लंघन गर्नेलाई गोलीसमेत हान्नसक्ने आदेश दिएको हो ।

सुरक्षासमितिको बैठक पछि जिल्ला प्रहरी कार्यालय सुर्खेतले आज कसैलाई पनि सडकमा ननिस्कन आग्रह गरेको छ । हिजो राति सवा ८ बजेदेखि लागेको कर्फ्यूमा आन्दोलनकारीलाई नियन्त्रणमा लिन चोक–चोकमा पर्याप्त प्रहरी खटाइएको छ ।

‘हामी सकेसम्म परिस्थिति नबिग्रियोस् भन्नेमा केन्द्रित भएका छौं । त्यसैले हिजो बेलुकादेखि नै कर्फ्यु आदेश जारी भएको स्थानमा निरन्तर सडकमा ननिस्कन नागरिकलाई माइकिङ गर्दै सूचना प्रवाह गरिरहेका छौं’, जिल्ला प्रहरी कार्यालय सुर्खेतमा प्रहरी डीएसपी रामप्रसाद घर्तीले भन्नुभयो, ‘अहिले परिस्थिति पूर्णरुपमा नियन्त्रणमा छ ।’

उहाँले हिजोको जस्तै अवस्था आए प्रशासनले दिएको आदेशअनुसार कारबाही गर्ने बताउनुभयो ।

यसैबीच, सोमबार सुर्खेतमा तोडफोड र आगजनी २३ जनालाई प्रहरीले पक्राउ गरेको छ। सुर्खेतका प्रमुख जिल्ला अधिकारी खगेन्द्रप्रसाद रिजालले पार्टी कार्यालयमा पुगेर ढुंगामुढा, आगजनी गर्ने २० जना र प्रहरी बीटमा आगो लगाउने ३ जनालाई प्रहरीले नियन्त्रणमा लिएको जानकारी दिनुभयो ।

प्रदर्शनकारीले नेकपा एमाले, नेपाली कांग्रेस र नेकपा माओवादी केन्द्रको पार्टी कार्यालयमा पुगेर ढुंगामुढा र आगजनी गरेका थिए।
प्रहरीका अनुसार एमालेको पार्टी कार्यालयको गेटनजिकै प्रदर्शनकारीले सामान बटुलेर आगो बालेका थिए। तत्कालै प्रहरीले उनीहरुलाई त्यहाँबाट भगाएको थियो।

यस्तै, कांग्रेस पार्टी कार्यालयमा ढुंगामुढा गर्दा झ्यालका सिसा फुटेका छन् । प्रदर्शनकारीले गरेको ढुंगामुढाबाट पार्टी कार्यालय नजिकै रहेको सुर्खेत उद्योग वाणिज्य संघको डिजिटल बोर्ड पनि फुटेको छ ।

प्रदर्शनकारीले माओवादी केन्द्रको कार्यालयमा पनि ढुंगामुढा गरेका छन्।वीरेन्द्रनगरको मंगलगढी चोकमा रहेको प्रहरी बीट पनि प्रदर्शनकारीले जलाएका छन् । जिल्ला प्रशासन कार्यालयले कर्फ्यू आदेश जारी गरिसकेपछि प्रहरी बीट जलाइएको हो।

यस्तै, प्रहरीमाथि समेत प्रदर्शनकारीले ढुंगामुढा गरेका छन्। यसबाट ८ जना प्रहरी पनि घाइते भएका छन्।

करिब साढे ८ बजेपछि भने वीरेन्द्रनगरको स्थिति नियन्त्रणमा आइसकेको कर्णाली प्रदेश प्रहरी कार्यालयले जनाएको छ।

‘त्यस्तो हताहत नै हुने खालको त भएको थिएन, केही अराजक व्यक्तिले भौतिक सम्पत्तिमा क्षति पुर्‍याएका छन्,’ प्रदेश प्रहरी प्रमुख प्रहरी नायव महानिरीक्षक गणेशबहादुर ऐरले भन्नुभयो, ‘अहिले स्थिति नियन्त्रणमा आइसकेको छ।’

प्रशासनले वीरेन्द्रनगरमा जारी गरेको निषेधाज्ञा उत्तरमा कपासे, दक्षिणमा काँक्रेबिहार, पूर्वमा सुब्बाकुना र पश्चिममा बांगेसीमलभित्र निषेध गरिएको छ ।