प्रकाश थापामगर/गोविन्दकुमार शर्मा/रोशन दानी, काठमाडौँ ।
आठ राजनीतिक दलले एम.सी.सी. विरुद्ध सशक्त प्रदर्शन गरेको छ । प्रदर्शनको क्रममा प्रहरी झड्प हुँदा नयाँ बानेश्वर रणमैदान बनेको थियो ।
प्रहरीले प्रदर्शनकारीहरूमाथि अश्रुग्यास, पानीको फोहराका साथै लाठीचार्जसमेत गरेको छ । लाठीचार्जमा युवा सङ्घ नेपालका महासचिव विदुषी, केन्द्रीय सदस्य अविनासलगायत थुप्रै प्रदर्शनकारीहरू घाइते भएका छन् ।
प्रहरी दमनका बाबजुद प्रदर्शनकारीहरू नयाँ बानेश्वर वरपर टायर बालेर लगातार विरोध प्रदर्शन गरेका थिए ।
प्रदर्शनपूर्व माइतीघर मण्डलाबाट एम.सी.सी. को विरुद्ध नयाँ बानेश्वरसम्म विशाल जुलुस प्रदर्शन गरिएको थियो । प्रदर्शनकारीहरूले एम.सी.सी. खारेज हुनुपर्ने विभिन्न नारा लगाएका थिए ।
नयाँ बानेश्वरमा पुगेपछि सो जुलुस साङ्केतिक विरोधसभा सम्पन्न भएको थियो । सभामा वैज्ञानिक समाजवादी कम्युनिस्ट पार्टीका जागृत रायमाझी, नेकपा (क्रान्तिकारी माओवादी) का पी.बी.एम. रामसिंह श्रीस, नेकपाका सचिवालय सदस्य कृष्णहरि भट्टलगायतले सम्बोधन गर्नुभएको थियो ।
कार्यक्रमको आयोजना नेकपा (मसाल), नेकपा (क्रान्तिकारी माओवादी, नेकपा (विप्लव पक्ष), नेकपा, राष्ट्रिय जनमोर्चा, देशभक्त जनगणतान्त्रिक मोर्चा, वैज्ञानिक समाजवादी कम्युनिस्ट पार्टी र नेकपा (माओवादी केन्द्र समाजवादी) ले गरेका थिए ।
