काठमाडौं । विवादित अमेरिकी सहायता परियोजना मिलेनियम च्यालेन्ज कर्पोरेसन (एमसीसी) खारेजीको माग गर्दै बुधबार साँझ देशैभर मसाल जुलुश प्रदर्शन गरिएको छ ।

नेकपा (मसाल) सहित विभिन्न ८ राजनीतिक दलको आयोजनामा देशका विभिन्न जिल्ला तथा क्षेत्रमा मसाल जुलुश प्रदर्शन गरिएको हो । कतिपय स्थानमा राष्ट्रिय जनमोर्चाले एकल रुपमा समेत मसाल जुलुश निकालेको छ भने अन्य दल र संघ संगठनले समेत जुलुश प्रदर्शन गरेका छन् ।

पोखरा
केन्द्रीय कार्यक्रम अन्तर्गत पोखरामा ६ राजनीतिक दल र दुई मोर्चाले एमसीसी सम्झौताको विरुद्धमा मसाल जुलुश निकालेका थिए । राष्ट्रिय जनमोर्चाको जिल्ला कार्यलय नजिकबाट सुरु भै सभा गृहमा निस्किएको जुलुश न्युरोडको बजार हुँदै नगर पालिका नजिक पुगेर एक घन्टा चक्का जाम गरि बीच बाटोमा कोणसभा गरि सम्पन्न भएको थियो ।

जुलुशलाई प्रहरी प्रसासनले धरपकड गर्ने, मसाल खोस्ने र लाठीचार्ज समेत गरेको थियो । उक्त लाठीचार्जमा राष्ट्रिय जनमोर्चा कास्कीका अध्यक्ष रविमोहन ढकालको हातमा चोट लागेको छ भने, अखिल (छैठौं) का केन्द्रीय उपाध्यक्ष गणेश अधिकारीको टाउकोमा चोट लागेको छ । त्यस्तै अखिल नेपाल ट्रेड युनियन महासंघ (अन्टुक) का केन्द्रीय सदस्य नाम बहादुर बाठा मगर र अखिल (छैठौ) कास्कीका अध्यक्ष सोमनाथ अधिकारीलाई समेत चोट लागेको छ । त्यस्तै अन्य आन्दोलनकारी नेता तथा कार्यकर्ताहरु समेत घाइते भएका छन् ।

कोणसभालाई संयुक्त आन्दोलनको तर्फबाट नेकपाका नेता भोज बहादुर त्रिपाठीले सम्बोधन गर्नु भएको थियो ।

प्युठान
एमसीसीविरुद्ध प्युठानका विभिन्न स्थानमा प्रदर्शन गरिएको छ ।

राजमो गौमुखी गाउँ समितिको आयोजनामा गौमुखीको ठूलाबेसी बजारमा मसाल जुलुश निकालिएको छ । मसाल जुलुश पछिको कोणसभालाई सम्बोधन गर्दै राजमो प्यूठानका सदस्य भरत केसीले नेपाललाई अस्तब्यस्त गराउन अमेरिकी साम्राज्यवाद लागि परेको र नेपालका दलालहरु डलरमा विकेको आरोप लगाउनु भयो । कोणसभाको सञ्चालन राष्ट्रिय जनमोर्चा गौमुखीका अध्यक्ष जनक केसीले गर्नु भएको थियो ।

यता, झिमरूक गाउँपालिकाको केन्द्र मच्छि बजारमा राष्ट्रिय जनमोर्चा झिमरूकको आयोजनामा मसाल जुलुश सम्पन्न भएको छ । बजार परिक्रमापछि आयोजित विरोध सभालाई गाउँपालिका अध्यक्ष तिलक जिसी, अखिल (छैटौं) का महासचिव सुभाष जिसी, राजमो केन्द्रीय सदस्य नारायण जिसी र मूल प्रवाह अखिल भारत नेपाली एकता समाजका केन्द्रीय सदस्य खिम बहादुर विकले सम्वोधन गर्नुभएको थियोे । कार्यक्रमको सञ्चालन किसान महासंघका केन्द्रीय सचिव वीर बहादुर जिसीले गर्नुभएको थियो ।

कपिलवस्तुको तीन ठाउँमा मसाल जुलुश
कपिलवस्तुको चन्द्रौटा र चार नम्बर जीतपुरमा मसाल जुलुश प्रदर्शशन भएको छ । दुवै ठाउँमा प्रहरीले मसाल खोस्ने प्रयास गरेको थियो । प्रदर्शनकारीहरुले प्रतिकार गरेका थिए ।

चन्द्रौटाको कोण सभालाई राष्ट्रिय जनमोर्चाका प्रतिनिधि छन्द बहादुर केसी र नेकपाका पावेलले सम्बोधन गर्नु भएको थियो । सञ्चालन नेकपाका बादल ले गर्नु भएको थियो । यसैगरी चार नम्बर जीतपुरको कोण सभालाई नेकपाका जिल्ला सेक्रेटरी कमल केसी, राष्ट्रिय जनमोर्चाका प्रतिनिधि सशी सापकोटा र नेकपा (क्रान्तिकारी माओवादी) का केन्द्रीय सदस्य धनेश्वर पोख्रेलले सम्बोधन गर्नु भएको थियो । सञ्चालन नेकपाका शेरमानले गर्नु भएको थियो ।

यता कपिलवस्तुको शिवराज नगर पालिका वडा नं ३ को खरेन्द्रपूरमा राष्ट्रिय जनमोर्चाले एमसीसी सम्झौता विरुद्ध कोण सभा सम्पन्न गरेको छ । राष्ट्रिय जनमोर्चा जिल्ला कोषाध्यक्ष चेतनारायण खनालको सञ्चालनमा सम्पन्न भएको कोण सभालाई राष्ट्रिय जनमोर्चा जिल्ला सल्लाहकार तथा अखिल नेपाल ट्रेड युनियन महासंघ (अन्टुक) का केन्द्रीय सदस्य केर सिंह अदै र जातीय समता समाजका केन्द्रीय सल्लाहकार दिल बहादुर विकले सम्बोधन गर्नु भएको थियो ।

सुदूरपश्चिमका ठाउँ ठाउँमा प्रदर्शन
यस्तै, सुदूरपश्चिमका विभिन्न स्थानमा एमसीसी खारेजीको माग गर्दै मसाल जुलुश प्रदर्शन गरिएको छ । कैलालीको धनगढी, अत्तरिया र लम्की, कञ्चनपुरको महेन्द्रनगर र डडेल्धुराको कोटेलीमा मसाल जुलुश प्रदर्शन गरिएको छ ।

अत्तरियामा आयोजित कोणसभालाई अखिल (छैठौं) का केन्द्रीय सचिवालय हेमराज भट्ट र देशभक्त जनगणतान्त्रिक मोर्चाका टंक कोइरालाले सम्बोधन गर्नुभएको थियो । यस्तै, धनगढीमा राष्ट्रिय जनमोर्चाका जिल्ला सचिव जगत जोशी र लम्कीमा नेकपा (मसाल) का जिल्ला प्रवक्ता मिलन शाहीले सम्बोधन गर्नुभएको थियो ।

यस्तै, दाङको घोराही र तुल्सीपुर, रुपन्देहीको बुटवल, सैनामैना, अर्घार्खाचीलगायतका क्षेत्रमा मसाल जुलुश प्रदर्शन गरिएको खबरहरु प्राप्त भएका छन् ।

निरन्तर प्रदर्शन, देशभरका जिल्ला प्रशासन कार्यालय घेराउ गरिँदै
संसदमा टेबुल भएको एमसीसी खारेज गर्न दबाब दिन आठ दलले प्रदर्शनलाई निरन्तरता दिने भएका छन् । आज (फागुन १२ गते) काठमाडौँमा विरोध प्रदर्शन सहित संसद घेराउको कार्यक्रम सम्पन्न हुनेछ भने देशव्यापी रुपमा जिल्लाहरुमा विरोध प्रदर्शन सहित जिल्ला प्रशासन कार्यालय घेराउ गर्ने कार्यक्रम रहेको छ ।

फागुन १३ गते देशव्यापी रुपमा संयुक्त कोणसभा सम्पन्न गरिने छन् । त्यसैगरी १४ गते देशव्यापी रुपमा विरोध सभा सम्पन्न गर्ने कार्यक्रम छ । फागुन १५ गते काठमाडौमा वृहद संयुक्त आमसभा सम्पन्न गर्ने कार्यक्रम रहेको छ ।

सरकारले अमेरिकाको हिन्द प्रशान्त रणनीति अन्तर्गतको एमसीसी अमेरिकाकै दबाबमा संसदबाट पास गर्ने तयारी गरेपछि त्यसविरुद्ध देशब्यापी आन्दोलन चर्केको छ । यही फागुन १६ गतेभित्र एमसीसी पारित गर्न अमेरिकाले दबाब दिइरहेको छ ।