काठमाडौं । रुसले युक्रेनमाथि मिसाइल आक्रमण सुरु गरेको छ । रसियन राष्ट्रपति भ्लादिमिर पुटिनले आक्रमणको घोषणा गरे लगत्तै सेनाले मिसाइल आक्रमण गरेको हो ।
बीबीसीका अनुसार युक्रेनका राष्ट्रपति भोलोडिमिर जेलेन्स्कीले मिसाइल आक्रमण भएको पुष्टि गरेका छन् । उनले रुसले युक्रेनको विभिन्न पूर्वाधार तथा सीमा सुरक्षाकर्मीमाथि मिसाइल आक्रमण गरेको पुष्टि गरेका हुन् ।
उनले राष्ट्रिय सुरक्षा परिषद्लाई सैन्य कानुन घोषणा गर्न आग्रह गरेका छन्। यस विषयमा निर्णय गर्न युक्रेनको सुरक्षा परिषद्को बैठक बस्दै छ।
यसअघि विदेशमन्त्री दिमित्रो कुलेबाले रुसले पूर्ण क्षमतासहितको आक्रमण सुरु गरेको बताएका थिए। सामाजिक सञ्जाल ट्वीटरमार्फत रुसले पूर्ण क्षमतासहितको आक्रमण सुरु गरेको बताएका हुन्।
‘शान्तिपूर्ण युक्रेनका सहरमा अहिले आक्रमण भएको छ। यो आक्रामक युद्ध हो। युक्रेन आफैंले यसको सामना गर्नेछ र जित्नेछ पनि’ उनले भनेका छन्, ‘विश्व समुदायले पुटिनलाई रोक्नुपर्छ र त्यसको लागि अहिले नै आवश्यक कदम चाल्नुपर्छ’, उनले भनेका छन्।
