काठमाडौँ । नेकपा मसाल, राष्ट्रिय जनमोर्चा र नेकपा (एकीकृत समाजवादी) ले काठमाडौँको चन्द्रागिरीमा मिलेनियम च्यालेन्ज कर्पोरेसन (एम.सी.सी.) को विरोधमा मसाल जुलुस निकालेको छ ।
तीन पार्टीहरूले चन्द्रागिरी नगरपालिका–६ मातातीर्थबाट गुर्जुधारा चोकसम्म २०७८ फागुन ३ गते मङ्गलबार साँझ ८ बजे विभिन्न नाराबाजी गर्दै मसाल जुलुस निकालेका हुन् ।
मसाल जुलुसपछिको कोणसभामा बोल्दै राष्ट्रिय जनमोर्चाका चन्द्रागिरी नगर इन्चार्ज रोसन दानीले मिलेनियम च्यालेन्ज अनुदानको नाममा साम्राज्यवादी शक्ति अमेरिकाको षड्यन्त्रमा नेपाल फस्न नहुने बताउनुभयो ।
‘यो नेपालको विकासका लागि होइन, आफ्ना सुरक्षा गतिविधि बढाउन लागि ल्याइएको हो’ उहाँले भन्नुभयो– ‘एम.सी.सी. को पक्षमा कुनै नेपाली छैनन् ।’
नेता दानीले ५०÷६० अर्ब रुपैयाँका लागि नेपालको सार्वभौमिकतामाथि आँच आउने काम कुनै पनि हालतमा हुन नहुने बताउनुभयो । एम.सी.सी. परियोजना संसद्बाट कुनै पनि हालतमा पास गर्न नहुनेमा दानीको जोड थियो ।
त्यस्तै, नेकपा (एकीकृत समाजवादी) नेता भाइकृष्ण बलामीले भन्नुभयो– ‘सम्पूर्ण नेपाली एम.सी.सी. को विरोधमा भएकाले संसद्बाट पारित हुने अवस्था छैन ।’
बलामीले विकास निर्माणका नाममा साम्राज्यवादी सर्त स्वीकार गर्न नसकिने बताउनुभयो ।
एम.सी.सी. परियोजना देश र राष्ट्रको हितका नभई चीन घेर्ने र देशलाई साम्राज्यवादीहरूको क्रिडास्थल बनाउन र आफ्नो व्यक्तिगत फाइदाका लागि निहित स्वार्थमा विदेशी मतियारहरू सकृय भएर देशलाई रणमैदान बनाउन लागेको आरोप उहाँले लगाउनुभयो ।
कार्यक्रममा राष्ट्रिय जनमोर्चा चन्द्रागिरी नगर समितिका अध्यक्ष मोहन जिसी, समाजवादीका युवा नेता अमिर महर्जनलगायत नेता–कार्यकर्ताहरूको सहभागि रहेको थियो ।
