काठमाडौं । नेपाल कम्युनिस्ट पार्टी (मसाल) ले भोलि (फागुन ४ गते) एमसीसीविरुद्ध देशब्यापीरुपमा संयुक्त कार्यक्रम हुने स्पष्ट पारेको छ ।
मिलेनियम च्यालेन्ज कर्पोरेसन (एमसीसी) विरुद्ध सहकार्यमा रहेका विभिन्न राजनीतिक दल वा एकल रुपमा पनि देशब्यापीरुपमा विरोध सभाको कार्यक्रम गरिने मसालले जनाएको छ।
भोलि बस्ने प्रतिनिधि सभाको बैठकमा सरकारले एमसीसी टेबुल गर्ने तयारी गरेपछि मसालसहितका राजनीतिक दलले त्यसको विरोध गरेका छन् ।
यस्तै, सोही कार्यक्रमको सन्दर्भमा कतिपय दलले ‘नेपाल बन्द’ को कार्यक्रम राखेकोमा मसालले आफ्नो पार्टी सो कार्यक्रममा संलग्नता नहुने पनि स्पष्ट पारेको छ । प्रवक्ता रामप्रकाश पुरीले जारी गर्नुभएको विज्ञप्तिमा ‘नेपाल बन्द कार्यक्रमबारे पूर्व जानकारी नभएर आज मात्रै जानकारी भएको र त्यसबारे हामीलाई तत्काल देशव्यापी रुपमा तयारी गर्न सम्भव नभएको’ बताइएको छ।
यस्तो छ वक्तव्य :
‘हाम्रो पार्टी ने.क.पा. (मसाल) लगायत विभिन्न बामपन्थी संगठनहरुको कार्यगत एकता भई एमसीसीका विरुद्ध विगतदेखि नै संयुक्त आन्दोलन हुँदै आएको छ ।
यस सिलसिलामा भोलि २०७८ फागुन ४ गते एमसीसी विरुद्ध संयुक्त आन्दोलनको कार्यक्रमको आयोजना गरिएकोमा कार्यगत एकतामा रहेका कतिपय बामपन्थी संगठनहरुले नेपाल बन्दको कार्यक्रमको आयोजना गरेको जानकारी प्राप्त भएको छ ।
हामीलाई उक्त नेपाल बन्द कार्यक्रमबारे पूर्व जानकारी नभएर आज मात्रै जानकारी भएको र त्यसबारे हामीलाई तत्काल देशव्यापी रुपमा तयारी गर्न सम्भव नभएकोले भोलिको बन्द कार्यक्रममा हाम्रो पार्टीको सहभागिता रहने छैन ।
तर पूर्व निर्धारित कार्यक्रम अनुसार देशभरि एमसीसीका विरुद्ध विरोध सभाका कार्यक्रम एकल वा संयुक्त रुपमा समेत आयोजना गरिने जानकारी गराइन्छ ।’
मिति २०७८ फागुन ३ गते
रामप्रकाश पुरी
प्रवक्ता
