जुमानसिंह केसी, प्युठान ।
अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) खारेजीको माग गर्दै बुधबार प्युठानमा विरोध सभा सम्पन्न भएको छ ।
प्युठानको सदरमुकाम खलंगामा राष्ट्रिय जनमोर्चा, नेकपा माले, नेकपा (क्रान्तिकारी) माओवादी र नेपाल कम्युनिस्ट पार्टीको संयुक्त आयोजनामा सभा सम्पन्न भएको हो।
विरोध सभालाई राजमोका केन्द्रीय सदस्य कृष्ण खड्काले सम्बोधन गर्दै सरकार एमसीसी पास गराउने तर्फ अग्रसर रहेकोले यो नेपाल र नेपालीको हित विपरीत भएको भन्दै नेपालको लागि घातक एमसीसी कुनै पनि हालतमा पास गर्न नहुने बताउनु भयो ।
नेकपा क्रान्तिकारी माओवादीका पोलिट्ब्युरो सदस्य धनेश्वर पोख्रेलले एमसीसी पास गर्न सरकार लागी परेको भन्दै राष्ट्रवादी शक्तिहरु एक हुनु पर्ने बताउनु भयो ।
नेपाल कम्युनिस्ट पार्टीका जिल्ला इन्चार्ज दलबहादुर केसीले नेपाली पोशाक लगाएर विदेशको दलाली गर्ने पार्टी र नेतालाई एमसीसी पास गरेर देखाउन चुनौती दिनु भयो।
त्यस्तै, नेकपा मालेका जिल्ला सचिव तिलविक्रम केसीले केह आर्थिक लोभ देखाएर अमेरिकी साम्राज्यवादले नेपालमा आफ्ना सेना राख्न र आफ्नो स्वार्थ पूरा गर्न खोजेको वताउनु भयो । उहाँले नेपाली दलालहरुलाई जनता विरुद्ध गतिविधि नगर्न चेतावनी दिनु भएको छ।
कार्यक्रमको सञ्चालन राजमोका नेता राम पहाडीले गर्नु भएको थियो ।
