दाङ । राष्ट्रिय जनमोर्चाका अध्यक्ष चित्रबहादुर केसीले अध्यक्ष केसीले राष्ट्रियताभन्दा ठूलो गठबन्धन हुन नसक्ने बताउनुभएको छ ।
राष्ट्रिय जनमोर्चा लमही नगर समितिले बिहीबार दाङको लमहीमा आयोजना गरेको पत्रकार भेटघाट कार्यक्रममा बोल्दै अध्यक्ष केसीले एमसीसी ल्याउने शर्तमा गठबन्धन कायम राख्न नसकिने स्पष्ट पार्नुभयो ।
राष्ट्रिय जनमोर्चाका लागि गठबन्धनभन्दा राष्ट्रियता ठूलो हुने केसीले बताउनुभयो । ‘उपलव्धि गुमाउन खोज्नेहरुको आडमा एमसीसी आउन थालेको छ । कुनैपनि हालतमा एमसीसी पास हुँदैन’ केसीले भन्नुभयो, ‘राष्ट्रिय जनमोर्चाका लागि गठबन्धन ठूलो होइन, राष्ट्रियता ठूलो हो ।’
अध्यक्ष केसीले जनताले लडेर ल्याएका उपलब्धिहरु फेरि गुम्ने खतरा बढेको बताउनुभयो । उहाँले संसद लामो समयसम्म अवरुद्ध हुँदा प्राप्त उपलब्धि गुम्ने खतरा रहेको औँल्याउनुभयो । जनताको आवाज बोल्ने थलो संसद लामो समयसम्म बन्द गर्नु राम्रो संकेत नभएको उहाँको भनाई थियो ।
‘देशमा हामीले गणतन्त्र ल्यायौँ, जनताका कतिपय हक अधिकार ल्याएपनि एक डेढ वर्षदेखि मुलुकमा संसद विधायिका चलेकै छैन । २०७७ पुस ५ गते पहिलो पटक संसद विघटन गरियो । फेरि विघटन भयो’ उहाँले भन्नुभयो, ‘दुवैपटक सर्वोच्च अदालतले पुनर्स्थापना गर्यो । तर, न व्यवस्थापिका चलेको छ, त न्यायपालिका चलेको छ, न त कार्यपालिका नै राम्रोसँग चलेको छ ।’
केसीले अहिले सरकारका तीन अंग नै अस्थव्यवस्थ अवस्था रहेको भन्दै व्यवस्थापिका संसदलाई भत्काएर चल्नै नदिएको, न्याय पालिकामा भद्रगोल मच्याइएको र सरकारले सुशासन दिन नसकेको बताउनुभयो ।
अर्को प्रशंगमा अध्यक्ष केसीले पार्टीबाट कारबाहीमा परेका केही व्यक्तिहरुले आफ्नो पार्टीको नाम जुधाएर अवसरको खोजी गरेको बताउनुभयो । त्यो समूहले अन्तै टाँसिन राष्ट्रिय जनमोर्चाको नामलाई दुरुपयोग गरेको केसीको भनाई थियो ।
राष्ट्रिय जनमोर्चा लमही नगर समितिका अध्यक्ष हरिबहादुर थापाको अध्यक्षतामा भएको कार्यक्रममा उपाध्यक्ष ताराप्रसाद खनालले स्वागत तथा सञ्चालन सचिव लेखराज आचार्यले गर्नुभएको थियो ।
