बुटवल । राष्ट्रिय जनमोर्चाका अध्यक्ष चित्रबहादुर केसीले नवनिर्वाचित राष्ट्रिय सभा सदस्यलाई बधाई दिनुभएको छ । राजमो लुम्बिनी प्रदेशद्वारा नवनिर्वाचित सदस्यको स्वागतमा आयोजित कार्यक्रममा अध्यक्ष केसीले उहाँहरुलाई अभिनन्दन गर्नुभएको हो ।

सो अवसरमा नवनिर्वाचित सांसदलाई बधाई दिँदै अध्यक्ष केसीले अहिले राष्ट्रिय सभामा गठबन्धनको विजयलाई विगतको निर्वाचनमा जस्तो सामान्य हारजितको रुपमा मात्रै लिन नहुने बताउनुभयो । यो जित प्रतिगमनविरुद्धको संघर्ष अन्तर्गत भएको अध्यक्ष केसीले औँल्याउनुभयो ।

अध्यक्ष केसीले प्रतिगमनतर्फ गएको राजनीतिलाई गठबन्धनले सही मार्गमा ल्याउन मद्दत गरेको उल्लेख गर्दै प्रतिगमनको खतरा अझै नसकिएको बताउनु भयो ।

अध्यक्ष केसीले देशमा राजावादी, एमाले र भारतले लोकतान्त्रिक गणतन्त्र तथा धर्म निरपेक्षता सिध्याउन अघोषित कार्यगत एकता गरेको जिकिर पनि गर्नुभयो । एमालेका अध्यक्ष केपी शर्मा ओलीले दुई दुई पटकसम्म गरेको संसद विघटन र भारतीय रअका प्रमुख सामन्त गोयलसँगको भेटघाट त्यसैको उपज भएको उहाँको भनाई थियो ।

‘हामीले उत्साहका साथ तत्कालिन नेकपालाई समर्थन गरेका थियौँ । तर हाम्रो समर्थन खेर गयो । जब २०७७ साल पुस ५ गते ओलीजीले पार्टीभित्र छलफल नै नगरी, पाटीभित्र बहस नै नगरी जब संसद विघटन गर्ने कुरा भयो, संसद विघटन गर्ने काम भयो, जसको आवश्यकता नै थिएन’ केसीले भन्नुभयो, ‘तपाइँले ७७ साल पुस ६ गतेको हाम्रो वक्तव्य हेर्नुभयो भने स्पष्ट हुन्छ, हामीले भनेका थियौँ अब यो प्रतिगमन यहीँमात्रै रोकिन्न है । यसले ठूलो आकार लिँदै जान्छ । यो संसदीय व्यवस्था नै ध्वस्त पार्ने, गणतन्त्र नै ध्वस्त पार्ने, धर्मनिरपेक्षता नै ध्वस्त पार्ने, ६२/६३ को जनओन्दोलनको उपलब्धि सिध्याउने खेल अन्तर्गत यो भइरहेको छ है । सामन्त गोयलसँग दुई दुई घण्टा त त्यसै भेट भएको होइन ।’

उहाँले गणतन्त्र र धर्मनिरपेक्षतालाई तत्कालिन ओली सरकारले धरापमा पार्दै मुलुकलाई अन्धकारतर्फ डोर्याउने असफल प्रयास गरिएको आरोप लगाउनुभयो । केसीले प्रतिगमनको खतरा अझै नसकिएको भन्दै वर्तमान गठबन्धनलाई आगामी निर्वाचनसम्म निरन्तरता दिनुपर्ने आवश्यकतामा समेत जोड दिनुभयो ।

कार्यक्रममा निर्वाचित राष्ट्रिय सभाका सदस्य तुलप्रसाद विक (राजेश) र राज्यलक्ष्मी गैरेलाई अध्यक्ष केसीले टिका र माला लगाएर सम्मान गर्नु भएको थियो । त्यसक्रममा उहाँले राष्ट्रियता, जनतन्त्र एवं जनजिविकाको सवालमा खरो उत्रनका लागि निर्वाचित सदस्यहरुसँग आग्रह पनि गर्नु भयो ।

कार्यक्रममा नवनिर्वाचित राष्ट्रियसभा सदस्य राजेश विकले जनताको अधिकारको रक्षा गर्दै दलित तथा पछाडी पारिएका नागरिकहरुको अधिकार रक्षाका लागि आफूले सधै इमान्दार भएर काम गर्ने प्रतिवद्धता व्यक्त गर्नु भयो । उहाँले आफ्नो जितलाई सबै दलित तथा सिमान्तकृत समुदायहरुको जित भएको बताउँदै प्रतिगमनकारी शक्तिको पराजय भएको धारणा राख्नु भयो ।

यस्तै, अर्का नवनिर्वाचित सदस्य राज्यलक्ष्मी गैरेले प्रतिगमन विरोधी गठबन्धनले प्राप्त गरेको जित सबै नेपालीको जित भएको उल्लेख गर्दै अंहकार र दम्भी राजनीतिलाई नेपाली जनताले अस्वीकार गरेको बताउनु भयो ।

राष्ट्रिय जनमोर्चा, बुटवल कार्यालयमा आयोजित कार्यक्रमको अध्यक्षता राजमो रुपन्देहीका अध्यक्ष बद्रे आलम, सञ्चालन गंगालाल सापकोटा तथा स्वागत गणेश गौतमले गर्नुभएको थियो ।

लुम्बिनी प्रदेशबाट गठबन्धनका तीन उम्मेदवार विजयी भएका थिए । उनीहरुमध्ये राजेश विक राष्ट्रिय जनमोर्चा, राज्यलक्ष्मी एकीकृत समाजवादी र युवराज शर्मा नेपाली कांग्रेसबाट विजयी हुनुभएको हो । शर्मा गृहजिल्ला बाँके गएकाले कार्यक्रममा उपस्थित हुनुभएको थिएन ।